Një influencuese 21-vjeçare, që pret një fëmijë dhe ndodhet në një marrëdhënie me 24 vjet diferencë, ka zbuluar detajet e pushimeve luksoze të financuara nga i dashuri i saj.

Ellie Liptrot, me origjinë nga Uellsi, u njoh me partnerin e saj, Mark, 45 vjeç, në fund të vitit 2021 kur ajo ishte vetëm 18 vjeçe.

Çifti nisi bashkëjetesën në qershor 2022, vetëm pak muaj pas njohjes, së bashku me dy fëmijët e vegjël të Mark, Izzie dhe Marcus, të cilët e quajnë Ellie-n “njerkë”.

Tani familja katër anëtarëshe po përgatitet të mirëpresë një anëtar të ri, pasi Ellie është shtatzënë në javët e fundit me fëmijën e saj të parë.

Për të festuar ardhjen e foshnjës, Mark e trajtoi Ellie-n me një qëndrim luksoz në hotelin Ushuaia në Ibiza, ku çmimet variojnë nga 420 deri në 8,100 paund nata.

Në një video në TikTok, Ellie tha: “Shumë njerëz nuk janë dakord me mua, por po e kaloj babymoon-in tim në javën e 35-të të shtatzënisë, dhe sigurisht, duhej të ishte në Ibiza.”

Ellie sqaroi se fëmijët e Markut nuk u ftuan në këtë udhëtim, pasi ajo dëshironte kohë vetëm për çiftin para ardhjes së foshnjës.

“Po, ky është një babymoon, kështu që fëmijët e tjerë nuk u ftuan. Fatkeqësisht, ata duhej të qëndronin në shtëpi për shkak të shkollës. Është mirë të kalojmë pak kohë vetëm unë dhe Mark, para se të bëhemi pesë në familje,” tha ajo.

Gjatë udhëtimit, Ellie mori masa paraprake për komoditetin e saj, përfshirë marrjen e një certifikate për të udhëtuar nga mjekja e saj dhe rezervimin e një sediljeje pranë korridorit të avionit.

Në Ibiza, Mark i siguroi Ellie-t një makinë me qira, për të shmangur pritjet e gjata për taksi. Hoteli luksoz ku ata qëndruan kishte një banjë me produkte Clarins dhe një vaskë me hidromasazh në ballkon.

Pas mbërritjes, çifti vizitoi restorantin e njohur Bambuddha. Ellie u shpreh: “Është ushqimi më i mirë që kam provuar ndonjëherë. Po, është i shtrenjtë, por ja vlen çdo qindarkë.”

Ellie gjithashtu ndau blerjet luksoze të bëra për djalin e saj që pritet të vijë së shpejti, përfshirë një çantë për ndërrimin e foshnjës nga Gucci, që kushton 1,620 paund, dhe një karrocë iCandy që kushton 1,593 paund.