Një delfin vrasës është në qendër të vëmendjes në ujërat e Britanisë, pasi është filmuar duke sulmuar dhe vrarë një peshkaqen dhe më herët një delfin të vogël të së njëjtës specie. Delfini i llojit bottlenose – i njohur zakonisht për sjellje lozonjare dhe inteligjencë të lartë – ka marrë nofkën “Jack the Flipper”, si një referencë e frikshme ndaj vrasësit legjendar “Jack the Ripper”.
I njëjti delfin, i quajtur fillimisht Anakin nga vrojtuesja e delfinëve Sarah Michelle Wyer, është pjesë e një grupi që banon në ujërat e New Quay, në Cardigan Bay, pranë Aberystwyth, Uells i Mesëm.
“Në tetë vitet që kam vëzhguar delfinët, nuk kam parë kurrë një delfin të hedhë një peshkaqen në ajër,” – tha Wyer.
“Por kur Anakin vrau delfinin e vogël, ishte rasti i parë i regjistruar i këtij lloji sjelljeje në Cardigan Bay.”
Pamjet e fundit tregojnë Anakin duke sulmuar një peshkaqen të llojit “smooth-hound”, një specie deri në katër metra e gjatë që nuk është pjesë e zakonshme e dietës së delfinëve. Në mars, ai u pa duke hedhur vazhdimisht në ajër një delfin të vogël derisa e vrau, një sjellje e panjohur më parë në këtë rajon.
Ndërkohë, ekspertët nuk arrijnë ta shpjegojnë plotësisht sjelljen e pazakontë. Sipas organizatës Dolphin Spotting Boat Trips, ku punon edhe Sarah:
“Fillimisht menduam se mbante një salmon në gojë, por më pas pamë që ishte një peshkaqen. Nuk kemi shumë të dhëna për raste kur bottlenose-t hanë smooth-hound. Mund të ketë qenë lojë, por nuk jemi të sigurt nëse e ka ngrënë apo jo.”
Delfinët bottlenose janë të njohur për sjellje komplekse, madje edhe të dhunshme, përfshirë vrasjen e marsuinëve (e njohur si porpicide). Por sulmi ndaj një delfini të të njëjtës specie, dhe tani ndaj një peshkaqeni, ka çuar në spekulime rreth një “personaliteti të errët” të Anakin.
“Delfinët nuk janë gjithmonë ‘miqësorët e detit’ që njerëzit mendojnë. Disa kanë sjellje që janë më afër grabitqarëve të rrezikshëm se sa figurës së ‘Flipper-it’ televiziv,” shtoi Wyer.
Tashmë, me një trup të ri viktimë dhe reputacion në rritje, Anakin ka fituar famën e frikshme si “delfini vrasës i Britanisë”. Sjellja e tij po monitorohet me vëmendje, por për momentin mbetet një enigmë që sfidon perceptimet tona për një nga krijesat më të adhurueshme të oqeanit.
