Policia e Durrësit ka finalizuar një operacion të rëndësishëm, ku u arrestua në flagrancë ish-kryeinspektori i IMT-së në Bashkinë Durrës, shtetasi A.H., i cili akuzohet për ndërtim të paligjshëm gjatë kohës kur ushtronte funksionin publik.
Resorti i ndërtuar pa leje nga ish-zyrtari
Hetimet zbuluan se ish-zyrtari kishte ndërtuar një resort të quajtur “Sent Michele Rezidencë”, i shtrirë në një sipërfaqe prej 5,600 m², i përbërë nga 11 kabina tip garsoniere, një godinë 2-katëshe, një fushë minifutbolli dhe një pishinë. Ky kompleks turistik u ndërtua gradualisht që prej vitit 2018, periudhë kur A.H. mbante postin e kryeinspektorit të IMT-së në Durrës.
Resorti, i ndërtuar në kundërshtim me ligjin, madje ishte reklamuar nga vetë ndërtuesi si një destinacion luksoz, ndërkohë që punimet vazhdonin pa leje ndërtimi. Sipas policisë, ky rast është një shembull i qartë i abuzimit me funksionin publik dhe shpërdorimit të detyrës, ku një ish-zyrtar që duhej të parandalonte ndërtimet pa leje, vetë ishte përfituesi kryesor i tyre.
Akuzat dhe procedurat ligjore
Materialet i janë referuar Prokurorisë së Posaçme (SPAK) për tre akuza të rënda:
- “Ndërtim i paligjshëm me qëllim përfitimi”
- “Korrupsion i zyrtarëve të lartë”
- “Shpërdorim i detyrës”
Policia theksoi se nuk do të tolerojë më raste të tilla, ku ish-zyrtarë apo administratorë publikë ndërtojnë pa leje duke shfrytëzuar funksionin shtetëror.
Operacione të tjera në Durrës
Në të njëjtën konferencë për shtyp, drejtori i Policisë së Durrësit bëri të ditur se është finalizuar edhe një operacion tjetër, i koduar “The Next Gun”, ku u arrestuan dy persona me rrezikshmëri të lartë shoqërore, të cilëve iu sekuestrua një armë zjarri me fishek në fole. Njëri prej tyre, 39-vjeçari A.M., ishte i shpallur në kërkim dhe i dyshuar për vendosjen e eksplozivit në një banesë në qytet më 13 gusht 2025.
Policia e Durrësit u ka bërë thirrje qytetarëve të denoncojnë çdo rast paligjshmërie dhe ka garantuar se operacionet do të vijojnë për parandalimin e ndërtimeve pa leje dhe forcimin e sigurisë publike.
