Bllokime rrugësh, goma të djegura dhe flamuj gjigantë në Tel Aviv; familjet e pengjeve i kërkojnë qeverisë të pranojë një marrëveshje armëpushimi. Izraeli ende pa përgjigje zyrtare ndaj propozimit të ndërmjetësuar nga Katari dhe Egjipti.
Izraelitë nga disa qytete nisën sot një “ditë të përballjes” (day of struggle) për të kërkuar një marrëveshje armëpushimi në Gaza që garanton kthimin e pengjeve. Protestuesit bllokuan autostrada dhe dogjën goma, ndërsa Forumi i Familjeve të Pengjeve dhe të Zhdukurve hapi marshimin duke shpalosur flamuj gjigantë izraelitë para degës së Ambasadës së SHBA në Tel Aviv. “Mesazhi ishte i qartë: 06:29 e mëngjesit të 7 tetorit – koha kur jeta jonë ndryshoi; në këtë orë hapim ditën kombëtare të përballjes”, njoftoi forumi.
Familjarë të pengjeve kërkuan ulje të menjëhershme në tryezën e bisedimeve. Hagit Chen, nëna e Itay Chen, tha: “Ka një ofertë në tavolinë. Kërkojmë që udhëheqësit tanë të ulen dhe të mos ngrihen pa një marrëveshje që garanton kthimin e pengut të fundit.” Yehuda Cohen, babai i pengut Nimrod Cohen, shtoi: “Mbi 80% duan fundin e luftës dhe një marrëveshje për pengjet. E gjithë Izraeli do fundin e këtij makthi.”
Gati një javë pasi Hamasi pranoi propozimin më të fundit të ndërmjetësuar nga Katari dhe Egjipti, qeveria e Izraelit ende nuk ka dhënë përgjigje – edhe pse kryeministri Benjamin Netanyahu thotë se po nis “menjëherë” negociatat për lirimin e të gjithë pengjeve dhe për përfundimin e luftës. Pas 18 muajsh ku pranoi vetëm marrëveshje të pjesshme dhe me faza, Netanyahu tani kërkon një pakt gjithëpërfshirës: lirimin e të gjithë pengjeve dhe mbylljen e konfliktit në kushtet e Izraelit. Protestuesit thonë se koha po kalon dhe i bëjnë apel kabinetit që të pëgjigjet ndaj propozimit të ndërmjetësuesve dhe të vendosë mbi jetët e pengjeve.
