Izraeli ka ndërmarrë një seri sulmesh intensive ajrore në zemër të Damaskut mbrëmjen e së mërkurës, duke shënjestruar selinë ushtarake të Sirisë dhe Ministrinë e Mbrojtjes. Sipas mediave shtetërore siriane, shpërthime të mëdha janë dëgjuar në kryeqytet, ndërsa është konfirmuar se ka disa viktima.

Pamjet nga vendngjarja tregojnë shtëllunga të mëdha tymi që ngrihen mbi qytet, ndërsa dronë izraelitë vazhdojnë të patrullojnë mbi zonën e sulmuar. Ky është sulmi më i fundit në kuadër të fushatës së gjatë të goditjeve ajrore dhe operacioneve tokësore të Izraelit në Siri, të cilat sipas Tel Avivit synojnë krijimin e një “zone të çmilitarizuar” në jug të vendit, pranë kufirit me Izraelin.