Pas përshkallëzimit të tensioneve në Lindjen e Mesme, Ministria e Jashtme e Izraelit ka urdhëruar mbylljen e të gjitha ambasadave dhe misioneve diplomatike në botë, duke përfshirë edhe ambasadën në Shqipëri. Vendimi përfshin pezullimin e të gjitha shërbimeve konsullore, në një masë të pashembullt që reflekton shqetësimin për sigurinë e shtetasve izraelitë jashtë vendit.
Në njoftimin zyrtar të ambasadave, u bëhet thirrje qytetarëve izraelitë të ndodhur jashtë vendit të plotësojnë një formular online për të raportuar vendndodhjen dhe statusin e tyre aktual, si dhe të ndjekin me kujdes udhëzimet e sigurisë:
- Shmangni simbolet hebraike/izraelite në publik
- Mos ndani informacione të ndjeshme në rrjete sociale
- Shmangni tubimet dhe ngjarjet që lidhen me Izraelin
- Bashkëpunoni me autoritetet vendase në çdo rast të dyshimtë
- Qëndroni vigjilentë në hapësira publike
Për raste emergjente, qytetarët izraelitë këshillohen të përdorin numrat e kontaktit të misioneve përkatëse në faqen zyrtare të Ministrisë së Punëve të Jashtme të Izraelit.
Ky veprim vjen në një moment delikat për sigurinë rajonale dhe ndërkombëtare, duke reflektuar tensione në rritje dhe shqetësime për mundësinë e sulmeve ndaj personelit diplomatik ose shtetasve izraelitë jashtë vendit.
