Të rinjtë u aksidentuan në tentativë për t’i ikur policisë, pasi ishin sinjalizuar për t’u ndaluar për kontroll nga policia. Mjeti u përplas me një shtyllë dhe me disa makina të tjera të parkuara. Drejtues ishte 19-vjeçari që mori plagë të lehta, ndërsa 18-vjeçari vdiq në vendngjarje.

Tentativa e dy të rinjve shqiptarë për t’u arratisur me një makinë të vjedhur përfundoi në tragjedi mëngjesin e së premtes në Bologna të Italisë. Automjeti tip Audi, që rezultoi e vjedhur, u përplas me një shtyllë teksa po ndiqeshin nga policia. Për pasojë ndërroi jetë njëri prej tyre, 18-vjeç, ndërsa tjetri, 19-vjeç, u dërgua në spital pa lëndime serioze.

Aksidenti i rëndë ndodhi rreth orës 05:00 të mëngjesit, kur dy të rinjtë po i iknin policisë, e cila i ndaloi në një semafor për kontroll. Por kur semafori u ndez jeshil, ata u larguan me shpejtësi me makinë. Shoferi ishte 19-vjeçari, i cili humbi kontrollin e automjetit në kryqëzimin Via Murri dhe Via dei Lamponi për shkak të shpejtësisë së lartë, duke u përplasur me shtyllën dhe më pas me disa makina të tjera të parkuara.

Në raportin e tyre, oficerët thanë se e humbën nga sytë automjetin, i cili po udhëtonte me mbi 200 km/orë, dhe më vonë e pikasën të përplasur. 19 vjeçari i plagosur nuk rezulton me precedentë penalë, ndërsa 18-vjeçari që vdiq, kishte qenë i dënuar më parë për vjedhje dhe rezistencë gjatë arrestimit nga policia.