Rachel Bailey, një nënë 32-vjeçare nga SHBA që u bë virale për praktiken e pazakontë të ushqyerjes me gji të bashkëshortit të saj, ka reflektuar mbi këtë përvojë 18 muaj pasi ajo përfundoi. Në një video të re në vlogun e tyre në YouTube, Rachel dhe bashkëshorti i saj, Alexander, shfaqen duke parë për herë të parë së bashku episodin e emisionit amerikan My Strange Addiction, ku ata rrëfyen publikisht zakonet e tyre.

Historia e çiftit bëri bujë më 2023, kur ata treguan se Rachel nisi të ushqente burrin me gji në vitin 2016 gjatë një udhëtimi me anije ku, pa pompën e qumështit, ndjeu dhimbje të forta nga bllokimi i gjirit. Alexander e ndihmoi ta lehtësonte këtë gjendje duke pirë qumësht, gjë që sipas çiftit u shndërrua në një ritual emocional dhe lidhës, jo seksual.

“Nuk ishte një fetishe. Ishte një mënyrë për të ndërtuar afërsi dhe intimitet,” deklaroi Rachel, duke theksuar se gjithmonë fëmijët ishin të parët për nga ushqyerja.

Tani që të tre fëmijët e tyre janë të zhveshur nga gjiri, edhe Alexander ka ndaluar. Rachel pranoi se të dy “e kanë vajtuar” përfundimin e kësaj eksperience dhe madje kishin menduar për një fëmijë të katërt, vetëm që ta rikthenin atë lidhje intime. “E diskutuam seriozisht, por kuptuam se ishte një hap i madh vetëm për këtë arsye,” tha ajo.

Në vlogun e tyre të fundit, teksa shikojnë episodin që dikur i bëri të famshëm, çifti shfaq ndjesi të përziera. Rachel e cilëson “cringe” (e sikletshme), ndërsa Alexander thotë se përjetimi është “si jashtë trupit të vet”. Ata nuk arritën ta shihnin të gjithë episodin nga sikleti, por e konsiderojnë përvojën si të veçantë dhe unike.

“Askush nuk flet më për të, dhe kjo është në rregull,” tha Alexander, duke shtuar se jeta vazhdon me tema të reja në rrjete sociale.

Në vend të ushqyerjes me gji, tani çifti zgjohet çdo mëngjes në orën 5 për të medituar dhe kaluar kohë bashkë – një mënyrë e re për të ruajtur lidhjen që dikur forcohej përmes një praktike të pazakontë, por thellësisht personale për ta.

“Na mungon, por kemi gjetur mënyra të tjera për të qenë pranë njëri-tjetrit,” përfundoi Rachel.