Sipas një raporti të detajuar të publikuar nga CNN më 21 maj, komunikime të përgjuara të radios ruse tregojnë se një komandant rus ka dhënë urdhër për të ekzekutuar ushtarët ukrainas që ishin kapur në vijën e parë të frontit. Urdhri ishte pjesë e një transmetimi më të gjerë të përgjuar, që hodhi dritë mbi një incident në rajonin lindor ukrainas të Zaporizhzhias në nëntor 2024 dhe u shoqërua me pamje nga droni të ekzekutimeve.
CNN siguroi pamjet nga droni dhe transmetimet e radios përmes inteligjencës ukrainase. Raporti shpjegon kontekstin e ngjarjes përpara se të publikonte një pjesë të transkriptit të urdhrave të dhëna nga komandanti rus. Pamjet tregonin gjashtë ushtarë ukrainas të shtrirë me fytyrë nga toka. Të paktën dy prej tyre u qëlluan nga afër, ndërsa një i tretë u mor me vete.
Inteligjenca ukrainase ndau një foto nga pamjet me CNN dhe media njoftoi se rasti po hetohet. Transmetimet e përgjuara janë pjesë e hetimit. Emri dhe grada e komandantit rus në komunikimet e interceptuara nuk janë përcaktuar, por dy ushtarët rusë përmenden me pseudonimet “Arta” dhe “Beily”.
Sipas inteligjencës ukrainase, transmetimi i përgjuar filloi në orën 12:05 me orën lokale, kur forcat ruse sulmuan një pozicion ukrainas, dhe zgjati deri në 12:31. CNN sqaroi se nuk ka mundur ta verifikojë këtë informacion.
“Njoftoni kush është komandanti. Kush është komandanti? Pyesni. Merrni komandantin rob dhe vrisni të gjithë të tjerët,” dëgjohet një zë rus në transmetim, sipas transkriptit. Një urdhër i ngjashëm përsëritet katër minuta më vonë: “Bëje ti. Merr komandantin dhe vrite pjesën tjetër. Kaq. Merr më të lartin dhe hiqi qafe të tjerët!”
CNN thekson se komandanti kërkonte përditësime të vazhdueshme, përpara se të mësonte se komandanti ukrainas nuk ishte mes të kapurve. “Arta” raportoi se një “i lartë” ukrainas ishte gjetur. Në orën 12:28 jepet për herë të gjashtë urdhri për ekzekutim dhe pamjet nga droni tregojnë një grup ushtarësh rusë që shfaqen nga bimësia.
Pamjet e dronit janë regjistruar nga ora 12:27 deri në 12:31. CNN vëren se ekziston një lidhje e qartë mes urdhrave të radios dhe asaj që ndodh në pamjet vizuale. “Shporru! Merr më të lartin, hiqi qafe të tjerët, shporru!” urdhëron komandanti.
Sipas raportit, një ushtar ukrainas bën një gjest drejt ushtarëve rusë vetëm pak çaste para se të qëllohet në kokë nga një rus i maskuar. “I vrave? Po pyes. I vrave?” dëgjohet më pas. “Arta! Arta! Unë jam Beliy, morëm urdhrin! I vratë të tjerët.”
Pamjet tregojnë më pas një ushtar ukrainas që besohet të jetë komandanti, i cili heq jelekun mbrojtës dhe shoqërohet larg. Një dron shihet në sfondin me tym nga një shpërthim, ndërsa trupat ruse urdhërohen të tërhiqen.
Shërbimi i Sigurisë së Ukrainës (SBU) identifikoi njësinë ruse të përfshirë si njësi “Storm” nga Regjimenti i 394-t i Këmbësorisë së Motorizuar, pjesë e Divizionit të 127-të rus.
Raportuesi Special i OKB-së për ekzekutimet arbitrare, Morris Tidball-Binz, tha për CNN se beson që incidente të tilla mund të autorizohen vetëm nga autoritetet më të larta të Rusisë. Raporti ishte një kujtesë tronditëse e krimeve të luftës që vazhdojnë çdo ditë në front.
Një raport i Drejtorisë Kryesore të Inteligjencës së Ukrainës i datës 24 maj, tregoi se janë dokumentuar mbi 150 raste të ekzekutimeve të menjëhershme. The Kyiv Independent raportoi se inteligjenca ukrainase beson se numri i vërtetë i ekzekutimeve është shumë më i lartë dhe se ato janë shtuar ndjeshëm që prej fillimit të vitit 2024.
Komisioni i Pavarur Ndërkombëtar i OKB-së për Ukrainën po ashtu ka gjetur prova për shtim të rasteve ku ushtarët ukrainas dorëzohen dhe më pas ekzekutohen apo gjymtohen nga forcat ruse – siç u raportua edhe në një raport më 19 mars. “Disa dezertorë rusë thanë për komisionin se kishin marrë urdhër që të mos merrnin robër, por t’i vrisnin menjëherë,” thekson raporti i OKB-së. Një zëvendëskomandant brigade citohet të ketë thënë: “Të burgosurit nuk duhen, qëllojini në vend.”
Në shkurt 2025, Misioni i OKB-së për Monitorimin e të Drejtave të Njeriut në Ukrainë shprehu shqetësim për shtimin e rasteve të ekzekutimit të robërve të luftës ukrainas. Deri në atë kohë, ishin dokumentuar 79 raste në incidente të veçanta.
