Një skenë tronditëse ka tronditur Malin e Llogarasë, ku 22 kuaj të lirë janë qëlluar me armë gjahu në një akt barbar që ka shkaktuar zemërim të madh publik. Katër prej tyre ngordhën menjëherë nga plagët e rënda, ndërsa pjesa tjetër është shpërndarë e fshehur në pyll – disa të plagosur, disa në gjendje kritike, duke pritur ndërhyrje urgjente veterinarësh. Pronarët ende nuk kanë mundur t’i lokalizojnë, pasi kafshët janë të traumatizuara dhe në panik.
Pamjet nga vendngjarja, të siguruara nga pronarët dhe aktivistët, tregojnë qartë mizorinë e ushtruar ndaj tufës që lëvizte e lirë në zonën malore. Banorët thonë se ky nuk është incidenti i parë, por përmasat e kësaj masakre e kanë bërë rastin të padurueshëm. Dyshimet e para bien mbi gjuetarë të paligjshëm, por nuk përjashtohet mundësia e një konflikti mes operatorëve që ofrojnë guida me kuaj për turistët në Llogara.
Aktivistët për mbrojtjen e kafshëve dhe komuniteti lokal i bëjnë thirrje autoriteteve për hetim të plotë dhe ndëshkim shembullor të autorëve, duke theksuar se mosveprimi institucional vetëm sa ushqen akte të tilla mizore. Ngjarja ka ndezur sërish debatin mbi mbrojtjen ligjore të kafshëve të lira në Shqipëri dhe nevojën për kontrolle të rrepta mbi përdorimin e armëve në zonat e mbrojtura.
