Një adoleshent britanik që terrorizoi policinë dhe provokoi dorëheqjen e një oficeri me përvojë është dënuar më në fund me burg, pasi u përfshi në një tjetër ndjekje të rrezikshme me makinë.

Mason McGarry, 19 vjeç, është dënuar me 12 muaj burg në një institucion për të rinjtë, pasi drejtoi një makinë me shpejtësi 60 milje në orë në një zonë ku limiti ishte 40, hipi në trotuar dhe u përplas me një kamion gjatë ndjekjes nga policia.

Adoleshenti ka 42 dënime të mëparshme, përfshirë vjedhje, grabitje, hyrje me forcë në banesa, drejtim të rrezikshëm, ngarje pa siguracion dhe sulm ndaj një punonjësi emergjence.

Incidenti që i kushtoi karrierën një polici me përvojë

Në vitin 2022, McGarry u përfshi në një ndjekje me motoçikletë elektrike dhe u rrëzua nga një automjet policie. Oficeri i Sussex Police, PC Tim Bradshaw, u akuzua për shkaktim dëmtimi të rëndë përmes drejtimit të rrezikshëm, por u shpall i pafajshëm nga juria.

Gjatë gjyqit, u zbulua se McGarry dhe shoku i tij Dominic Mizzi (22 vjeç) kishin bërë gjeste fyese ndaj oficerit para se të arratiseshin. Bradshaw rrëfeu se i kishte prekur lehtë me tamponin e makinës për t’i ndalur, një manovër që sipas tij ishte e autorizuar dhe e arsyeshme.

“Nuk kishte asnjë gërvishtje në makinën time. Ishte kontakt i lehtë dhe i nevojshëm,” tha oficeri në gjyq.

Gjyqtari e cilësoi çështjen si “me rëndësi të veçantë” për praktikat policore në ndjekjet me e-bikes.

Por vetëm një muaj pas përfundimit të procesit gjyqësor, McGarry u kap sërish në një ndjekje me makinë.

Ndjekja e fundit: me makinën e huazuar, me motra në sedilje

Më 28 mars 2024, McGarry mori hua një Vauxhall Insignia, por nuk e ktheu në kohë. Miku i tij njoftoi policinë. Ndjekja ndodhi në Chichester, West Sussex, ndërsa në makinë ndodheshin edhe motra dhe dy persona të tjerë.

Prokurori Gary Venturi deklaroi se McGarry:

arriti shpejtësi deri në 60 milje/orë në zonë me kufizim 40,

hipi në trotuar,

dhe goditi një kamion, duke shkaktuar 1,200 paund dëme.

Ai u ndal pranë shtëpisë së tij pas 5 minutash ndjekje.

McGarry pranoi fajësinë për:

drejtim të rrezikshëm,

marrje pa leje të mjetit,

drejtim gjatë pezullimit,

mosndalim për policinë,

mungesë siguracioni.

“Në herën e pestë, do vrasë dikë”

Gjyqtarja Jodie Mittell, duke parë pamjet e ndjekjes, tha:

“Ishte fat i madh që askush nuk ishte duke ecur në atë trotuar.”
“Herën e pestë, ai do vrasë dikë. Mund të jetë edhe motra e tij.”

Ajo i tërhoqi vëmendjen se me sjelljen e tij po rrezikonte jetën e vet dhe të personave që donte.

“Feral”, pa ndjeshmëri dhe pa pendesë” – Oficeri Bradshaw flet për përballjet me të riun

Në një intervistë përpara gjyqit, PC Bradshaw e quajti McGarry “një adoleshent i egër që thjesht nuk ndalet kurrë”.

Ata njiheshin që kur McGarry ishte 12 vjeç. Bradshaw tregoi se vetëm një muaj më parë ishte përballur me të në një autobus, ku McGarry u mburr me atë që i kishte “marrë punën”.

“Ai më hodhi tym marihuane në fytyrë dhe më kërcënoi familjen,” tha oficeri. “Pastaj u hodh drejt meje me një mik të maskuar që po kërcënonte një shofer autobusi me thikë. Dhe asgjë nuk u bë kundër tyre.”

Bradshaw i bëri thirrje drejtuesve policorë që të ndërhyjnë më fort ndaj problemit të e-bikes ilegale, që sipas tij po minojnë sigurinë publike dhe po dekurajojnë policinë të veprojë me vendosmëri.