Një video e shpërndarë së fundmi nga Rrjeti i Gazës tregon një moment të rrallë dhe tronditës: një burrë palestinez që komunikon drejtpërdrejt me një oficer të ushtrisë izraelite, vetëm disa minuta përpara se shtëpia e tij të goditet nga një sulm ajror.

Në regjistrimin audio të videos, dëgjohet ushtari izraelit duke thënë:
“Dëgjo, duhet të largohesh tani. Do të godasim shtëpinë.”

Burri palestinez, në vend që të frikësohet apo të lutet, përgjigjet me ironi therëse:
“Hajde pra, pse po vonohesh kaq shumë? Na thuaj drejt – edhe sa minuta ke ndërmend të presësh për të shtënë? Kam ca gjëra për të marrë.”

Kjo bisedë tronditëse përshkruan me pak fjalë absurdin e realitetit në Gaza: banorë që paralajmërohen vetëm minuta përpara bombardimeve, ndërsa ironia mbetet një nga të paktat armë shpirtërore që u ka mbetur.

Videot e tilla po qarkullojnë gjithnjë e më shumë në rrjetet sociale, ndërkohë që komuniteti ndërkombëtar mbetet i ndarë mes apeleve për ndalim zjarri dhe mbështetjes pa kushte për Izraelin. Për civilët palestinezë, megjithatë, dilema nuk është politike: është çështje jete a vdekjeje.