Parlamenti i Ukrainës u përfshi nga kaosi të enjten, kur dy deputetë u përleshën fizikisht pak çaste para votimit të një ligji vendimtar që rikthente pavarësinë e institucioneve kyçe kundër korrupsionit. Përplasja erdhi pasi presidenti Volodymyr Zelensky u detyrua të tërhiqej nga një projektligj kontrovers që kishte miratuar në heshtje, i cili dobësonte ndjeshëm autonominë e Byrosë Kombëtare Antikorrupsion (NABU) dhe Prokurorisë Speciale Antikorrupsion (SAPO).
Përballë zemërimit të gjerë brenda vendit, protestave masive në Kiev dhe kritikave nga Bashkimi Evropian, SHBA dhe organizata ndërkombëtare, Zelensky propozoi një draft të ri që garanton pavarësinë e plotë të agjencive. Ligji u miratua me 331 vota pro dhe asnjë kundër. Votimi, i transmetuar drejtpërdrejt – për herë të parë që nga pushtimi rus – u shoqërua me tensione dhe përplasje fizike mes ligjvënësve.
Protestat që e detyruan presidentin të bëjë një “U-kthesë” ishin ndër më të mëdhatë që nga fillimi i luftës me Rusinë. Rreth 2,000 deri në 3,000 qytetarë, shumica të rinj, sfiduan ndalimin e tubimeve dhe u mblodhën në qendër të Kievit për të kërkuar ruajtjen e institucioneve anti-korrupsion. Revolta popullore nisi pasi ligji i parë u miratua me shpejtësi, i fshehur mes ndryshimeve në një tjetër legjislacion, çka ngriti frikën se qeveria mund të ndërhynte në hetime për të mbrojtur aleatët e saj.
Zelensky pranoi gabimin duke deklaruar se “shteti duhet të dëgjojë zërin e popullit”, ndërsa e cilësoi ligjin e ri si “vendim të drejtë” që garanton funksionimin e pavarur të institucioneve të drejtësisë. Presidentja e Komisionit Evropian, Ursula von der Leyen, e përshëndeti vendimin, duke e cilësuar si një hap të nevojshëm për të avancuar në rrugën drejt BE-së.
Ligji fillestar kërcënonte të bllokonte 1.7 miliardë dollarë ndihma nga BE-ja dhe minonte përpjekjet e Ukrainës për të ruajtur standardet e qeverisjes së mirë. Organizata Transparency International në Ukrainë paralajmëroi se dobësimi i NABU dhe SAPO ishte kthim prapa nga reformat e fituara pas revolucionit të 2014-ës. Këto agjenci kanë ndjekur penalisht zyrtarë të lartë, ministra dhe ish-bashkëpunëtorë të ngushtë të Zelenskyt, edhe gjatë kohës së luftës.
Kriza nxori në pah betejën e brendshme të Ukrainës për të mbajtur angazhimin ndaj vlerave demokratike, ndërkohë që përballet me një ofensivë të përshkallëzuar nga ushtria ruse dhe paqartësi mbi ndihmën ushtarake perëndimore në vazhdim.
