Greta Thunberg dhe aktivistët e “Freedom Flotilla” kanë mbërritur në aeroportin Ben Gurion të Izraelit për t’u dëbuar, konfirmoi Ministria e Jashtme izraelite në orët e para të mëngjesit të së martës. Sipas autoriteteve, ata që refuzojnë të firmosin dokumentet e deportimit do të përballen me një proces gjyqësor.

Aktivistët, përfshirë Thunberg, u arrestuan të hënën nga forcat izraelite pasi anija e tyre me flamur britanik “Madleen” u ndalua në ujërat ndërkombëtare, rreth 100 milje larg Gazës. Sipas avokatëve të tyre, të gjithë pjesëtarët e ekuipazhit janë dërguar në burgun Givon, pranë qytetit Ramle, ku zakonisht mbahen emigrantët e parregullt.

Spray kimik dhe ndalim i dhunshëm në det

Koalicioni i Flotiljes së Lirisë akuzon Izraelin për “ndërhyrje të dhunshme” në det të hapur. Aktivistët raportuan se u spërkatën me një substancë të bardhë irrituese nga dronë dhe katërhelice, ndërsa komunikimet u ndërprenë dhe iu luajtën zëra shqetësues në radio.

Fotot nga anija tregojnë kuvertën e mbuluar me substancë të bardhë. Aktivistja Yasmin Acar tha se i djegnin sytë dhe se substanca kishte efekte të dëmshme. Huwaida Arraf, bashkëthemeluese e Lëvizjes Ndërkombëtare të Solidaritetit, e quajti ndërhyrjen “shkelje flagrante të ligjit ndërkombëtar dhe urdhrave të Gjykatës Ndërkombëtare të Drejtësisë”.

Avokatët kërkojnë informacion – Suedia refuzon ndihmën për Thunberg

Avokatët e aktivistëve u ankuan se nuk u është dhënë asnjë informacion për vendndodhjen e klientëve të tyre dhe u mohua kontakti me ta. Ndërkohë, ministrja suedeze për Çështjet e Jashtme, Maria Malmer Stenergard, deklaroi se Greta Thunberg nuk ka nevojë për mbështetje konsullore dhe kritikoi thirrjen e saj publike, që sipas saj “bllokoi linjën telefonike të ndihmës për qytetarët në nevojë”.

Reagime ndërkombëtare dhe akuza për “pirateri shtetërore”

Ngjarja ka shkaktuar reagime të forta ndërkombëtare. Spanja thirri zyrtarin izraelit në ambasadë, ndërsa Franca kërkoi kthimin e gjashtë shtetasve të saj. Turqia e quajti sulmin “një akt të shëmtuar” dhe “shkelje të qartë të ligjit ndërkombëtar”.

Ndërkohë, në Londër, protestuesit u mblodhën para zyrave të Ministrisë së Jashtme britanike me pankarta që thonin: “Izraeli sulmon një anije britanike – Britania s’bën asgjë”. Deputetja e Partisë së Gjelbër, Ellie Chowns, e cilësoi ndërhyrjen si të papranueshme dhe kërkoi lirimin e menjëhershëm të aktivistëve.

Izraeli: S’kishte ndihmë reale, por një spektakël selfie

Izraeli, nga ana tjetër, e quajti anijen “selfie yacht” dhe pretendoi se misioni ishte për vetëpromovim të Thunberg dhe aktivistëve të tjerë. Ministri i Mbrojtjes Israel Katz përgëzoi ushtrinë për ndërhyrjen “të shpejtë dhe të sigurt” dhe u shpreh se të gjithë personat në bord janë të padëmtuar.

Pas arrestimit, Izraeli u tregoi aktivistëve një video 43-minutëshe të masakrave të Hamasit më 7 tetor. Ministria e Jashtme izraelite konfirmoi se ndihmat në bord – që përfshinin formula për foshnja, ushqime dhe ilaçe – do të kalojnë përmes “kanaleve të vërteta humanitare”.

Skena humanitare në Gaza – thirrje për më shumë ndihmë

Anija “Madleen” u nis nga Italia më 1 qershor për të ndërgjegjësuar botën mbi krizën e urisë në Gaza, të cilën OKB e ka cilësuar si “vendi më i uritur në botë”. Ndërsa Izraeli pretendon se bllokada detare është e nevojshme për të ndaluar armët, agjencitë humanitare dhe OKB kanë akuzuar Izraelin për pengimin e ndihmës.

Gjendja humanitare në Gaza po përkeqësohet. Të dielën, sipas mbrojtjes civile palestineze, sulmet izraelite lanë të paktën 10 të vdekur, përfshirë pesë civilë pranë një pike ndihmash.