Kuzhinieri i famshëm britanik Gordon Ramsay është shënjestruar së fundmi nga një incident i rrezikshëm “swatting”, kanë bërë të ditur autoritetet amerikane. Sipas burimeve të TMZ, shtëpia e tij në Bel Air, Kaliforni, ishte në qendër të një telefonate mashtruese që njoftonte për të shtëna armësh në ambientet e pronës së tij.

Ngjarja ndodhi ndërsa Ramsay, 58 vjeç, nuk ndodhej në shtëpi, konfirmojnë burime të afërta me situatën. Policët mbërritën në vendngjarje, por konstatuan se nuk kishte asnjë incident të vërtetë, duke biseduar edhe me fqinjët që kishin parë zhvillimet nga afër.

“Swatting” është një praktikë gjithnjë e më shqetësuese në SHBA, ku persona anonimë thërrasin shërbimet emergjente me pretendime të rreme, me qëllim që të dërgojnë forca të armatosura policore në adresat e viktimave – shpeshherë figura publike si yje të showbiz-it apo politikanë.

Policia e Los Anxhelosit ka hapur një hetim lidhur me incidentin, ndërsa përfaqësues të Ramsay-t dhe bashkëshortes së tij, Tana, nuk kanë dhënë ende komente zyrtare.

Kuzhinieri me yje Michelin, i njohur për emisionet televizive si Hell’s Kitchen dhe Kitchen Nightmares, nuk ka reaguar as në rrjetet sociale. Ramsay nuk është personazhi i vetëm i famshëm që ka përjetuar një sulm të tillë; më parë janë shënjestruar edhe Cardi B, Rihanna, Jennifer Aniston, Nicki Minaj, Justin Bieber, Paris Hilton, Chris Brown dhe të tjerë.

Në një intervistë për revistën St. Louis vitin e kaluar, Ramsay kishte folur për një prej bezdive më të mëdha personale: duhanin tek kuzhinierët. “Është zakoni më i neveritshëm në planet. Shkatërron shijen,” kishte thënë ai, duke theksuar se nuk ka pirë kurrë cigare në jetë dhe se shija është një dhuratë që duhet trajnuar dhe ruajtur me kujdes.