Gjykata Kushtetuese e Kosovës ka vendosur të shpallë të pavlefshme të gjitha seancat e Kuvendit të zhvilluara nga 27 qershori deri më 26 korrik 2025, duke konstatuar se deputetët nuk kanë zbatuar aktgjykimin paraprak. Sipas vendimit, kryesuesi i seancës konstituive, Avni Dehari, nuk e ka respektuar urdhrin e mëparshëm të Kushtetueses, duke urdhëruar vijimin me pikën e tretë të rendit të ditës, që ishte votimi për kryeparlamentarin, pa përmbushur më parë detyrimet e përcaktuara nga gjykata.
Vendimi i ri i Kushtetueses përcakton se partia fituese e zgjedhjeve ka të drejtë të propozojë kandidatin për Kryetar të Kuvendit, por vetëm deri në tre herë për të njëjtin emër, ndërsa votimi duhet të kryhet me procedurë të hapur. Gjykata ka urdhëruar gjithashtu që të gjithë deputetët të jenë të pranishëm dhe të marrin pjesë në votim, duke theksuar se procesi i konstituimit duhet të bëhet në përputhje të plotë me Kushtetutën dhe aktgjykimet e saj.
Për zbatimin e këtij vendimi, deputetëve u është dhënë një afat 30-ditor nga hyrja e tij në fuqi për të përfunduar konstituimin e Kuvendit. Ky zhvillim pritet të ndikojë drejtpërdrejt në ecurinë e procesit politik në Kosovë, duke e detyruar shumicën parlamentare dhe opozitën të gjejnë zgjidhje brenda afatit të përcaktuar ligjërisht.
