Një studim i ri i publikuar në Alzheimer’s & Dementia ka nxjerrë në pah një lidhje të mundshme mes kohës që u duhet njerëzve për të hyrë në fazën REM të gjumit dhe rrezikut për të zhvilluar sëmundjen e Alzheimer-it. Sipas të dhënave, personat që kalojnë më ngadalë në fazën REM – periudha kur ndodhin ëndrrat dhe konsolidohen kujtimet – kanë më shumë gjasa të shfaqin shenja të hershme të Alzheimer-it. Në studim u përfshinë 123 pjesëmarrës, nga të cilët një pjesë kishin Alzheimer, të tjerë dëmtim të lehtë konjitiv dhe pjesa tjetër funksionim të rregullt.
Edhe pse nuk ka ende prova përfundimtare që gjumi i dobët shkakton Alzheimer-in, ekspertët theksojnë se cilësia e gjumit ndikon drejtpërdrejt në shëndetin e trurit. Neurologu Dr. W. Christopher Winter thotë se “cilësia e dobët e gjumit është e lidhur me rrezik të shtuar për demencë”, ndërsa këshillon orar të qëndrueshëm, aktivitet fizik dhe shmangien e kafeinës pasditeve për të përmirësuar gjumin. CDC rekomandon gjithashtu ushtrime, menaxhimin e presionit të gjakut dhe diabetit, si dhe shmangien e alkoolit dhe duhanit për të reduktuar rrezikun. Sipas studiuesve, faza REM mund të bëhet në të ardhmen një tregues i hershëm diagnostik për Alzheimer-in.
