Ndërsa hipnin në taksinë e tyre të ujit për të lundruar nëpër kanalet e Venecias dhe për të nisur festën me darkën luksoze të provës përpara dasmës me yje, Jeff Bezos dhe zonja e ardhshme Bezos më në fund u dhanë spektatorëve një pamje të asaj që pritet nga kjo ceremoni që mund të kushtojë deri në 20 milionë dollarë.
Edhe pse shumica do të prisnin që nusja të ishte në qendër të vëmendjes, ishte Bezos – dhe jo Lauren Sanchez – ai që doli në plan të parë.
Në një qytet që dikur vendosi standardet për teprinë dhe luksin europian, mbreti i teknologjisë amerikane dha një përshëndetje mbretërore, ndërsa e fejuara e tij qëndronte pas tij – thuajse me ndrojtje – po aq e palëvizshme sa dhe fustani që kishte veshur.
Fustani, i ngushtë dhe i ngurtë si një kostum teatral, dukej i bërë nga material më i përshtatshëm për një manekin (apo një mobilje) sesa për një grua të gjallë.
Ndoshta e frymëzuar nga praktikat ekstreme të formësimit të belit që mikja dhe e ftuara në dasmë Kim Kardashian ka promovuar shpesh, Sanchez kishte zgjedhur një korse të artë vezulluese që formonte bustin e fustanit – një material po aq i pasur sa silueta e tij ishte shtypëse.
Fustani ishte nga koleksioni couture i vitit 2025 i Schiaparelli. Nuk ishte bërë me porosi, por kërkonte ndikim për ta siguruar dhe kushton deri në 100,000 dollarë.
I dizenjuar për të nxjerrë në pah belin tepër të hollë dhe fizikun e tonifikuar të Lauren-it, fustani kishte qëndisje të ndërlikuar me motive lulesh në fund dhe – në mënyrë të pazakontë për të – një dekolte të mbyllur dhe të thjeshtë.
Zgjedhja e Sanchez për darkën e provës – një natë që për një nuse duhet të jetë e çlodhshme dhe pa presion – dukej se ishte bërë enkas për të siguruar që ajo të ishte qendra absolute e vëmendjes në mesin e të ftuarve të saj të famshëm.
Ashtu si çdo gjë tjetër rreth kësaj martese ekstravagante, edhe garderoba e Sanchez ka qenë subjekt spekulimesh të çmendura.
Duke lënë mënjanë bikinit provokuese që ajo kishte veshur në festën me shkumë mbi jahtin gjigant të Bezos disa ditë më parë, ajo bëri debutimin e saj të shumëpritur në Venecia të mërkurën me një fustan të stilit vintage nga Alexander McQueen, i vitit 2003.
Fustani i gjatë, me një supe të zhveshur dhe vija diagonale me kopsa të bardha në të gjithë gjatësinë, është shumë e mundur që është blerë në një nga butikët e preferuar të Lauren në Hollywood, Timeless Vixen. Ai shpaloste ndjeshmëri të vërtetë stilistike – të llojit që i përshtatet një miliardereje.
Në kontrast, fustani i së enjtes – më i përshtatshëm për një ballo maskaradë të Venecias – ishte një zgjedhje e çuditshme, sidomos kur vendoset krahas thjeshtësisë së të fejuarit të saj.
Duke hyrë në martesën e tij të dytë me një estetikë qartazi italiane dhe moderne – këmishë e bardhë e hekurosur, jaka e hapur dhe një kostum pa dyshim nga liri italian i klasit të parë – Bezos dukej rehat, përkundër Lauren-it që dukej e “burgosur”.
Të ftuarit si Tom Brady, Orlando Bloom dhe Leonardo DiCaprio kishin ndjekur shembullin e stilit të thjeshtë të Bezos-it.
Por ndërsa dhëndri lëvizte lirisht dhe me lehtësi, Lauren ishte e mbyllur në një fustan që ishte po aq i ngushtë sa ndërhyrjet estetike në fytyrën e saj – dhe ndoshta po aq kufizues sa marrëveshja paramartesore që ajo ndoshta ka firmosur.
Si fuqia financiare pas kësaj ceremonie miliona dollarëshe, Bezos – mund të supozohet – ndjen të drejtën për të shijuar festën që po e paguan vetë.
Sepse kjo martesë e përfolur nuk është vetëm një shfaqje dashurie të dytë, por edhe një demonstrim i fuqisë së Bezos për të përkulur botën sipas dëshirës së tij.
Dhe bashkëshortja e tij e ardhshme, sado e stolisur e e kuruar, mbetet një metaforë për pabarazinë mes një burri që e fiton vetë pasurinë dhe një gruaje që martohet me të.
