Një përplasje serioze diplomatike ka shpërthyer mes Gjermanisë dhe Kinës, pasi ushtria kineze akuzohet se ka përdorur lazer ndaj një avioni ushtarak gjerman gjatë një operacioni të BE-së në Detin e Kuq. Ministria e Jashtme gjermane ka reaguar ashpër, duke e cilësuar incidentin një kërcënim për jetën e personelit gjerman dhe ndërprerje të papranueshme të misionit.

“Ushtarakët kinezë kanë përdorur lazer ndaj një avioni gjerman në operacionin ASPIDES të BE,” shkruan Ministria në rrjetin social X. “Kërcënimi i jetës së stafit gjerman dhe ndërprerja e misionit janë krejtësisht të papranueshme. Ambasadori kinez është thirrur sot në Ministrinë e Jashtme.”

Sipas burimeve të BILD, kjo nuk është hera e parë që Kina përdor lazer ndaj avionëve perëndimorë. Rastet e mëparshme përfshijnë edhe sulme nga një bazë kineze në Xhibuti që nga viti 2018, ku janë lënduar pilotë amerikanë. Lazerët e përdorur, ndonëse jo për qëllime raketash, kanë efekt verbues dhe ndërhyjnë në sistemet elektronike të avionëve.

Operacioni ASPIDES, mision ushtarak detar i BE-së i nisur në vitin 2024, synon mbrojtjen e lirisë së lundrimit në rrugët detare strategjike si Deti i Kuq dhe Gjiri i Adenit. Avionët gjermanë kryejnë fluturime të rregullta për mbikëqyrje dhe siguri në këtë zonë të tensionuar.

Burime diplomatike konfirmojnë se ambasadorit kinez në Berlin i është përcjellë qartë pakënaqësia dhe paralajmërimi i qeverisë gjermane: “Nuk pranojmë që ushtarët tanë të rrezikohen,” deklaruan zyrtarë për BILD. Incidenti pritet të ndikojë më tej në marrëdhëniet tashmë të tendosura mes Perëndimit dhe Kinës.