Një ngjarje e rëndë është zbuluar pasditen e sotme në fshatin Shtikë të Kolonjës, ku është gjetur trupi i dekompozuar i një burri, pranë një stacioni elektrik. Sipas Policisë së Korçës, kufoma dyshohet të ketë qenë në atë vend për të paktën 6 muaj, ndërsa ende nuk është identifikuar.

Ngjarja u raportua rreth orës 15:00 dhe menjëherë në vendngjarje mbërritën grupi hetimor dhe ekspertë të kriminalistikës, të cilët po punojnë për zbardhjen e rrethanave dhe përcaktimin e shkakut të vdekjes. Nga këqyrja paraprake nuk janë konstatuar shenja dhune apo dëmtime të shkaktuara nga faktorë të jashtëm.

Hetimet janë përqendruar fillimisht në identifikimin e viktimës dhe më pas në përcaktimin e shkakut të vdekjes, ndërsa trupi i pajetë është dërguar për autopsi në morgun e spitalit përkatës. Autoritetet mbeten në pritje të ekspertizës mjeko-ligjore për të hedhur dritë mbi këtë ngjarje misterioze që ka tronditur banorët e zonës.