Gjatë periudhës janar–maj 2025, buxheti i shtetit ka mbledhur 62.3 miliardë lekë nga TVSH-ja mbi mallrat e importuara. Kjo shumë rezulton 514 milionë lekë më tepër, ose rreth 0.8% më shumë se në të njëjtën periudhë të vitit të kaluar. Megjithatë, krahasuar me objektivin e parashikuar, arkëtimet janë 4.1 miliardë lekë më të ulëta, duke sjellë një diferencë negative prej -6.1% ndaj planit për pesëmujorin e parë të këtij viti.
Një faktor i dukshëm që ka ndikuar në këtë mosrealizim lidhet me tregtinë e automjeteve. Importet e makinave të përdorura kanë ulur të ardhurat me rreth 665 milionë lekë, që përkthehet në një rënie prej 16% krahasuar me një vit më parë. Në të njëjtën kohë, edhe mjetet e reja kanë sjellë një efekt negativ prej 333 milionë lekësh, duke shënuar një tkurrje prej 27%.
Sipas të dhënave të DPSHTRR, gjatë pesë muajve të parë të 2025 janë regjistruar gjithsej 38,028 mjete, nga të cilat 81.2% janë autovetura. Ky rezultat është dukshëm më i ulët se ai i një viti më parë, kur në të njëjtën periudhë u regjistruan 41,535 mjete.
Automjetet, veçanërisht ato të përdorura, kanë qenë gjithmonë një burim i rëndësishëm i të ardhurave nga TVSH-ja e importit. Ulja e regjistrimeve tregon jo vetëm ngadalësimin e kërkesës së brendshme, por edhe faktin se tregu i makinave po shkon drejt ngopjes. Nga ana tjetër, shtrenjtimi i kostos së jetesës, i kombinuar me shpenzimet e larta të mirëmbajtjes së mjeteve, po kufizon gjithnjë e më shumë aftësinë financiare të qytetarëve. Këto vështirësi po reflektohen drejtpërdrejt edhe në këtë sektor të ekonomisë shqiptare.