Franca është zhytur në një krizë të re politike pasi deputetët rrëzuan me votë mosbesimi kryeministrin François Bayrou, duke e detyruar të japë dorëheqjen vetëm nëntë muaj pas marrjes së detyrës. Bayrou u mund pas tentativës për të kaluar një plan shkurtime prej 44 miliardë eurosh, që parashikonte heqjen e dy festave kombëtare dhe ngrirjen e shpenzimeve publike. Nga 558 deputetë të pranishëm, 364 votuan kundër tij, shumë mbi pragun e 280 votave të nevojshme për ta rrëzuar.
Presidenti Emmanuel Macron pritet të emërojë një kryeministër të ri në ditët në vijim, por opsionet e tij janë të kufizuara. Dy emrat që përmenden më shumë janë ministri i Mbrojtjes, Sébastien Lecornu, dhe ministri i Drejtësisë, Gérald Darmanin. Megjithatë, opozita e majtë dhe e djathta kanë paralajmëruar se do të rrëzojnë çdo kandidat centrist, duke e futur vendin në një bllokim politik të rrezikshëm.
Kriza vjen në një moment të ndjeshëm ekonomikisht dhe gjeopolitikisht për Francën. Tregjet financiare reaguan menjëherë, me interesat e obligacioneve franceze që kaluan mbi ato të Spanjës, Portugalisë dhe Greqisë, ndërsa një ulje e mundshme e vlerësimit të borxhit nga agjencitë ndërkombëtare mund ta godasë rëndë ekonominë. Ndërkohë, në rrugë ka shpërthyer zemërimi popullor: e majta ka thirrur protesta kombëtare për të mërkurën me sloganin “Bloquons tout” (“Bllokojmë gjithçka”), ndërsa sindikatat planifikojnë një tjetër mobilizim më 18 shtator.
Franca hyn kështu në një periudhë pasigurie të thellë, ku analistët paralajmërojnë se përfituesit kryesorë do të jenë e djathta ekstreme e Marine Le Pen dhe e majta radikale, ndërsa kampi i Macron shkon drejt rënies së peshës politike. Kjo dobësi e Parisit shihet si një dhuratë për Vladimir Putinin dhe Donald Trumpin, të cilët prej kohësh shfrytëzojnë çdo krizë europiane për të theksuar dobësitë e Bashkimit Europian.
