Franca u përfshi në kaos këtë mëngjes pasi një fushatë protestash dhe grevash nën emrin “Bllokojmë gjithçka” u hodh në veprim në mbarë vendin. Brenda orëve të para, Ministri i Brendshëm njoftoi afro 200 arrestime, ndërsa protestuesit përpiqeshin të çrregullonin rrjetet kyçe të transportit, përfshirë edhe qendrën e Eurostar në Gare du Nord, Paris.

Sipas policisë në kryeqytet, shumica e të ndaluarve akuzohen për “kërcënim ndaj rendit publik”. Ndërkohë, paralajmërohet se numri i protestuesve pritet të rritet gjatë ditës.

Grupet e protestuesve kanë tentuar disa herë të bllokojnë rrugën unazore të Parisit gjatë orëve të para të mëngjesit, duke ngritur barrikada, duke hedhur objekte drejt policisë, ngadalësuar trafikun dhe ndërmarrë veprime të tjera të protestës. Protestues të veshur me maska dhe kapuçë janë parë gjithashtu në Bordeaux dhe Marseille, duke u përpjekur të bllokojnë kryqëzimet rrugore.

Ministri i Brendshëm, Bruno Retailleau, raportoi se një autobus u dogj në qytetin perëndimor të Rennes dhe dëmtimi i një linje elektrike shkaktoi ndërprerje në linjat hekurudhore në jugperëndim të Francës. Ai akuzoi protestuesit se po përpiqen të krijojnë një “klimë kryengritjeje”.

Këto trazira ndodhën më pak se 24 orë pasi Presidenti Emmanuel Macron emëroi kryeministrin e tij të shtatë në më pak se nëntë vjet. Kryeministri i ri, Sébastien Lecornu, ka premtuar se do të bëjë një punë më të mirë se paraardhësi i tij François Bayrou, i cili u detyrua të japë dorëheqjen pasi humbi një votëbesim të vetëimponuar në parlamentin francez.

Bayrou u largua pasi propozoi shkurtime drastike në shpenzimet publike në vlerë prej 35 miliardë paund, si pjesë e një përpjekjeje për të ulur borxhin kombëtar që ka arritur në 114% të PBB-së. Masat përfshinin shkurtimin e dy festave zyrtare, ngrirjen e pensioneve dhe pagesave të mirëqenies sociale, si dhe pushimin nga puna të mijëra nëpunësve civilë.

Lecornu ka premtuar se do të përpiqet të ndërtojë një shumicë në Asamblenë Kombëtare për të kaluar të njëjtin buxhet shtrëngues të mbështetur nga Macron – një plan që ka zemëruar miliona qytetarë.

Rreth 80,000 policë dhe xhandarë janë dislokuar në mbarë vendin për t’u përballur me fushatën “Bllokojmë gjithçka”. Protesta po koordinohet kryesisht në rrjetet sociale dhe mbështetet nga sindikata më e madhe franceze, CGT (Konfederata e Përgjithshme e Punëtorëve).

Ndër veprimet e planifikuara janë bllokimi i depove të karburantit, operacione të ngadalësimit të trafikut dhe protesta në qendrat e qyteteve. Mesazhe të shpërndara online kanë inkurajuar madje qytetarët të hyjnë në supermarkete, të mbushin çantat me ushqime dhe të largohen pa paguar.

Këto zhvillime janë krahasuar gjerësisht me protestat e vitit 2018 të “Jelekëve të Verdhë” që filluan për shkak të rritjes së çmimit të karburantit, por më vonë u shndërruan në një lëvizje të gjerë kundër Macron dhe reformave të tij ekonomike.

Ashtu si Jelekët e Verdhë, edhe lëvizja “Bllokojmë gjithçka” nuk ka udhëheqje qendrore. Por ndryshe nga ta, nuk ka ende një simbol apo veshje dalluese, përveç veshjes me rroba të zeza.

Në disa qytete janë raportuar përplasje të ashpra me policinë. Në Paris, Montpellier, Nantes, Lyon, Marseille dhe Caen, janë ngritur barrikada në flakë, janë hedhur goma që digjen dhe janë përdorur gaz lotsjellës nga ana e policisë për të shpërndarë turmat. Në Rennes, u dogj një autobus ndërsa protestuesit bllokuan autostradat dhe unazat kryesore.

Gjithashtu, është raportuar për një zjarr kabllor në Toulouse, i cili, edhe pse u neutralizua shpejt, arriti të shkaktonte ndërprerje të trafikut hekurudhor në zonën mes Toulouse dhe Auch.

Ministri Retailleau konfirmoi se vetëm në Paris janë arrestuar mbi 75 persona, ndërsa 6,000 forca sigurie janë vendosur vetëm në kryeqytet. Në të gjithë Francën janë raportuar ndërprerje të trafikut dhe përplasje me policinë në të paktën dhjetë qytete kryesore.

Protestat po zhvillohen paralelisht me një grevë të dy ditore të punonjësve të transportit në Francë, dhe përkojnë me një grevë të planifikuar në metronë e Londrës, duke krijuar një krizë të madhe për pasagjerët që udhëtojnë me trenin Eurostar mes Londrës dhe Parisit.

Ndërkohë, sindikata Sud-Rail ka publikuar një mesazh në rrjetin X, ku shkruan: “Rënia e qeverisë është një hap i mirë, por nuk mjafton”, duke inkurajuar anëtarët e saj që të bashkohen në grevë.

Protestuesit kanë bërë thirrje për një tjetër ditë veprimi më 18 shtator, ku përfshihet edhe një grevë nga kontrollorët e trafikut ajror , gjë që mund të paralizojë udhëtimin ajror në Francë.

Zyra e Presidentit Macron ka deklaruar se ai i ka kërkuar kryeministrit të ri të nisë bisedime me të gjitha palët opozitare në parlament për të gjetur kompromis për buxhetin dhe politikat e tjera, përpara se të emërojë kabinetin e ri qeveritar.

Aktualisht, qeveria franceze përbëhet vetëm nga Presidenti Macron dhe Kryeministri Lecornu.