Një ushtar britanik është përballur me një dramë të tmerrshme dhe një faturë të majme mjekësore pasi rrëshqiti dhe ra nga një ujëvarë në Tajlandë, duke i thyer kafkën dhe femurin.

Liam Gibson, 21 vjeç, pjesëtar i “Royal Electrical and Mechanical Engineers”, ishte duke bërë fotografi në ujëvarën piktoreske Na Muang Waterfall 2 në ishullin Koh Samui kur humbi ekuilibrin dhe u rrëzua në një shkëmb disa metra më poshtë.

Për më shumë se dy orë, e dashura e tij, Lucy Baldwin, 20 vjeç, u përpoq dëshpërimisht ta mbante gjallë, e mbështjellë rreth trupit të tij të përgjakur, vetëm centimetra larg një rënieje 100 metra poshtë.

“Kur e pashë në atë gjendje, u shtanga nga paniku. Mbështolla krahët dhe këmbët rreth tij, u ula në një pellg gjaku dhe e mbajta që të mos rrëshqiste më tutje”, rrëfeu Lucy për MailOnline. “Kishte kockën që i dilte nga këmba dhe kafka e çarë… Ishte një tmerr.”

Pas pesë orësh agonie, Liam u dërgua me urgjencë në një spital lokal ku iu nënshtrua tre operacioneve të mëdha dhe transfuzioneve të shumta gjaku.

Mjekët zbuluan se ai kishte thyer femurin në tre pjesë, krahun e djathtë, dorën e majtë, kockat e fytyrës dhe kafkën, me plagë të hapura deri në kockë.

Megjithatë, ai nuk mund të bëjë operacionin rikonstruktiv të këmbës derisa të rikthehet në Angli, ndërsa fatura mjekësore ka kaluar 100 mijë paund dhe po rritet çdo ditë. Çifti, që ishte vetëm në javën e parë të një udhëtimi njëmujor me çantë shpine, ka nisur një GoFundMe për të mbledhur fonde për kthimin në atdhe.

Lucy tha: “Jemi njerëz që s’na pëlqen të kërkojmë ndihmë, por nuk kemi zgjidhje tjetër. Spitalet janë shumë të shtrenjta dhe koha nuk është në anën tonë.”

Ata ishin nisur për të eksploruar ishullin me motoçikletë kur panë ujëvarën në TikTok dhe vendosën ta vizitonin. Ajo nuk e pa më Liam për disa minuta dhe kur e gjeti, ai ishte i rrëzuar dhe pa ndjenja në një faqe shkëmbi.

“Nëse do të kishte rënë deri në fund të ujëvarës, do të kishte vdekur në vend”, tha ajo, duke kujtuar se në vitin 2019 dy turistë humbën jetën në të njëjtin vend pasi rrëshqitën mbi gurët e lagësht.

Zyra e Jashtme britanike konfirmoi se është në dijeni të rastit dhe është e gatshme të ofrojë ndihmë konsullore. Autoritetet turistike tajlandeze dhe policia lokale janë kontaktuar për komente.

Liam, i cili ka pesë vite shërbim në ushtri dhe ka organizuar aktivitete bamirësie për shëndetin mendor të burrave, është përshkruar nga e dashura si “njeri që ndriçon çdo dhomë ku hyn”.