Një ngjarje tronditëse ka dalë në dritë në Arcadia të Kalifornisë, ku një vilë e shndërruar në një “fabrikë surrogate” u bë skena e abuzimeve çnjerëzore ndaj foshnjave të lindura përmes surrogacisë. Sipas dokumenteve të siguruara nga Daily Mail, 15 fëmijë u gjetën në ambientet e brendshme të shtëpisë, ndërsa në total u identifikuan 21 fëmijë, shumica nën moshën 3 vjeç. Pamjet nga kamerat e sigurisë tregojnë sesi fëmijët rreshtoheshin në klasa të improvizuara, detyroheshin të bënin ushtrime, ulërinin nga të qarat dhe dhuna, ndërsa disa u goditën nga dado ose mësuese në prani të fëmijëve të tjerë.
Pronarët e shtëpisë, Guojun Xuan, 65 vjeç, dhe Silvia Zhang, 38 vjeç, u arrestuan së bashku me dadon Chunmei Li, 56 vjeçe, pasi një foshnjë 2 muajshe, i quajtur Walter, përfundoi në kujdes intensiv me dëmtime të rënda në kokë të ngjashme me trauma nga përplasjet në aksidente automobilistike ose nga lëkundjet e dhunshme. Video të siguruara nga policia tregojnë momentin kur Li lëkund foshnjën me forcë dhe më pas ai humbet vetëdijen. Në një moment tjetër, Walter dëgjohet duke qarë, derisa një goditje e rëndë shënon heshtjen e menjëhershme. Hetuesit zbuluan se në vilë kishte 9 dhoma gjumi, klasa me dërrasa të bardha, frigoriferë të shumtë, karroca, kuti me pelena dhe formula, duke ngritur dyshime për një skemë të organizuar surrogacie me përfitime financiare.
Zhang u justifikua se vetëm dy prej fëmijëve ishin të saj biologjikë, por nuk dha shpjegime bindëse për origjinën e të tjerëve. Një nga nënat surrogate, Kayla Elliot nga Teksasi, ka nisur një fushatë për të rikthyer vajzën e saj, të cilën e kishte dorëzuar sipas marrëveshjes me çiftin. Ajo zbuloi se agjencia e ndërmjetësimit, “Mark Surrogacy”, ishte e regjistruar në të njëjtën adresë me vilën, gjë që rrit dyshimet për funksionimin e një rrjeti të paligjshëm surrogacie. Të gjithë fëmijët janë marrë nën kujdesin e Departamentit të Fëmijëve dhe Shërbimeve Familjare në Kaliforni, ndërsa hetimet për abuzimet, mashtrimet dhe origjinën e fëmijëve po vazhdojnë. Çifti ndodhet aktualisht i lirë me kusht, me garanci prej 500,000 dollarësh secili.
