Foto tronditëse tregojnë reperin Tory Lanez të mbuluar me gjak pasi u sulmua brutalisht dhe u ther 14 herë brenda një burgu në Kaliforni.

Reperi 42-vjeçar, i cili po vuan një dënim dhjetëvjeçar për plagosjen me armë të Megan Thee Stallion gati pesë vite më parë, u sulmua nga një i burgosur tjetër më 12 maj në Institutin Korrektues të Kalifornisë në Tehachapi.

Pamjet tregojnë këngëtarin e gjakosur duke ecur në një korridor me pantallona të shkurtra gri dhe zinxhirë të artë, me fytyrën e tronditur dhe trupin e mbuluar me gjak.

Sulmi u konfirmua nga një video rrëqethëse 39 sekondëshe, e publikuar të mërkurën, ku Lanez shihet teksa del nga një qeli dhe ndalet pranë shkallëve, kur agresori – i identifikuar nga The Shade Room si Santino Casio – i afrohet dhe e sulmon me thikë.

Therja nis ndërsa Lanez ende qëndron në këmbë, por ai rrëzohet shpejt në tokë. Rreth sekondës së 21-të, Casio shihet mbi reperin duke e goditur vazhdimisht, ndërsa Lanez përpiqet të shpëtojë duke bërë lëvizje të dëshpëruara.

Gjatë gjithë sulmit, Lanez bërtet “O Zot” nga dhimbja, ndërsa askush nuk ndërhyn për ta ndalur dhunën.

Në fund, Lanez arrin të ngrihet dhe të vrapojë poshtë shkallëve, duke u zhdukur nga kamera pak para se videoja të përfundojë.

Pamje të tjera tregojnë skenën e mbuluar me gjak pas sulmit.

Pak pas ngjarjes, ekipi i Lanez konfirmoi: “Tory u godit me thikë 14 herë – përfshirë shtatë plagë në shpinë, katër në bust, dy në pjesën e pasme të kokës dhe një në anën e majtë të fytyrës.”

Ata shtuan se ai “tani po merr frymë vetë” pasi “të dy mushkëritë iu shembën dhe u vendos në një aparat frymëmarrjeje”.

Përfaqësuesit e reperit thanë: “Pavarësisht dhimbjes, ai po flet normalisht, është në humor të mirë dhe falënderon Zotin që po ia del mbanë. Ai gjithashtu falënderon të gjithë për lutjet dhe mbështetjen e vazhdueshme.”

Sulmi ndodhi në një njësi banimi rreth orës 07:20 të mëngjesit, konfirmoi Departamenti i Korrektimeve dhe Rehabilitimit të Kalifornisë.

“Stafi reagoi menjëherë, thirri urgjencën dhe nisi ndihmën mjekësore. Peterson u transportua më pas në një qendër mjekësore civile për trajtim të mëtejshëm,” tha Pedro Calderón Michel, zëdhënës i institucionit.

Njësia Hetimore e CCI dhe Zyra e Prokurorit të Qarkut Kern po hetojnë incidentin. Edhe Zyra e Inspektorit të Përgjithshëm është informuar.

Një burim për TMZ bëri të ditur se një ambulancë e çoi Lanez në një spital civil në Bakersfield, rreth një orë larg me makinë.

Sipas Page Six, Lanez u godit disa herë në fytyrë.

DailyMail.com kontaktoi me ekipin e Lanez për koment.

Aktualisht, ai po vuan një dënim prej dhjetë vitesh burg për ngjarjen ku qëlloi Megan Thee Stallion në këmbë në korrik 2020. Ai u dënua në dhjetor 2022 për sulm me armë zjarri gjysmë-automatike, mbajtje të armës së ngarkuar dhe të paregjistruar në automjet, dhe qëllim me pakujdesi të rëndë.

Në gusht 2023, gjykata e L.A.-s e dënoi me dhjetë vjet burg për tre akuza të rënda. Gjyqtari David Herriford tha se ishte e vështirë të pajtoheshin dëshmitë pozitive për karakterin e Lanez me veprimet e tij ndaj Megan: “Ndonjëherë njerëzit e mirë bëjnë gjëra të këqija. Veprimet kanë pasoja dhe nuk ka fitues në këtë rast.”

Në gjyq, Megan dëshmoi se Lanez e qëlloi në këmbë duke i bërtitur që të kërcejë ndërsa dilte nga një SUV pas një feste në shtëpinë e Kylie Jenner. Ajo tha se iu desh të nënshtrohej operacionit për të hequr fragmentet e plumbave nga këmbët.

“Nga momenti që u qëllova mizorisht nga i pandehuri, nuk kam pasur asnjë ditë paqësie,” tha këngëtarja në një deklaratë të lexuar para dënimit. “Ngadalë po shërohem, por nuk do të jem më kurrë e njëjta.”

Para se të dënohej, Lanez kërkoi një dënim më të shkurtër ose lirim me kusht, duke shprehur pendesën e tij: “Sikur të mund të ktheja mbrapsht ngjarjet e asaj nate, do ta bëja. Viktima ishte mikesha ime. Ajo është dikush për të cilën kujdesem ende. Marr përgjegjësinë e plotë për gjithçka që bëra gabim atë natë.”

Lanez u kreditua me dhjetë muaj për kohën e kaluar në paraburgim që nga dënimi.

Avokati i tij kryesor, Jose Baez, u shpreh “jashtëzakonisht i zhgënjyer” me vendimin, duke thënë se dënimi u dha për ta bërë shembull për shkak të famës së reperit. “Ai nuk është një shembull – është një qenie njerëzore. Kam parë raste aksidentesh me vdekje që marrin më pak se dhjetë vjet,” shtoi ai.

Në shkurt, ai dorëzoi një apel, duke pretenduar “pranimin e gabuar të provave” dhe “keqtrajtim të çështjes nga prokuroria”, sipas Us Weekly.

Prokurorët e vlerësuan Megan për guximin që tregoi duke dalë hapur, përballë urrejtjes dhe talljes online që përjetoi.

Prokurori i Qarkut të Los Anxhelosit, George Gascón, tha: “Shpresoj që guximi i zonjës Pete t’i japë shpresë atyre që ndihen të pafuqishëm.”

Llogaria në Instagram e Lanez ka qëndruar aktive gjatë kohës në burg, dhe javën e kaluar ai ndau një foto me të tjerë që dukej se ishte bërë brenda qelisë.