Autori i masakrës në një shkollë në Austri, i cili vrau 10 persona në ish-shkollën e tij, është fotografuar për herë të parë që prej sulmit.

21-vjeçari Artur A., nga një periferi e Graz-it, shihet në një foto duke mbajtur macen e tij, ndërkohë që janë zbuluar detaje të reja mbi të kaluarën e tij dhe planet e braktisura për një shpërthim me bombë artizanale.

Ish-nxënësi i shkollës vrau një mësues dhe nëntë nxënës të moshave 14–17 vjeç gjatë masakrës në shkollën e mesme BORG Dreierschützengasse në Graz.

11 persona të tjerë u plagosën rëndë, para se Artur t’i jepte fund jetës së tij në tualetin e shkollës.

Policia tha se ai përdori dy armë që i zotëronte ligjërisht – një pistoletë dhe një pushkë gjahu – dhe qëlloi për 13 minuta rresht.

Mësohet se Artur, një i ri i përjashtuar nga shkolla dhe i përndjekur nga bullizmi, i dërgoi nënës një video lamtumire para sulmit, duke i kërkuar ndjesë për atë që po planifikonte të bënte. Ajo e hapi videon 24 minuta më vonë dhe lajmëroi menjëherë policinë, por atëherë ishte tepër vonë: Artur kishte kryer tashmë sulmin dhe kishte kryer vetëvrasje.

Në një tjetër mesazh të lënë pas, ai fajësonte shkollën dhe bullizmin për veprimin e tij, ndërsa i lutej që dikush të kujdesej për macen e tij, sipas “Kronen Zeitung”.

Hetuesit zbuluan në banesën e tij një bombë artizanale të papërdorshme dhe plane të braktisura për një shpërthim, duke sugjeruar se ai mund të kishte synuar edhe më shumë viktima.

“Është gjetur një letër lamtumire, si në formë fizike, ashtu edhe digjitale”, deklaroi drejtori i sigurisë publike në Ministrinë e Brendshme të Austrisë, Franz Ruf. “Ai i përshëndet prindërit e tij. Por motivi nuk mund të nxirret nga letra lamtumirëse – kjo është ende pjesë e hetimeve.”

Ruf shtoi se ende nuk është e qartë nëse viktimat ishin zgjedhur rastësisht apo në mënyrë të qëllimshme.

Nxënësit e vrarë ishin nga mosha 14 deri në 17 vjeç, ndërsa një mësues gjithashtu humbi jetën.

Artur, që do të mbushte 22 vjeç për më pak se dy javë, nuk kishte llogari personale në rrjetet sociale dhe përshkruhej si një vetmitar që mbante kontakt vetëm me një mik, të cilit nuk i kishte treguar asgjë.

Ai nuk ishte aktiv në asnjë grup shoqëror apo klub. “Dukej sikur askush nuk e kishte vënë re ndonjëherë”, tha kryebashkiaku i Kalsdorf-it, Manfred Komericky.

Artur kishte studiuar informatikë në shkollë të mesme dhe më pas kishte ndjekur një shkollë biznesi deri në vitin 2019. Jetonte me nënën e tij beqare dhe përpiqej të gjente punë.

Policia konfirmoi se Artur kishte qenë dikur nxënës në të njëjtën shkollë ku ndodhi masakra, por ai nuk i kishte përfunduar studimet. Nga viktimat, gjashtë ishin vajza dhe tre djem të moshave 14–17 vjeç, njëri prej të cilëve kishte shtetësi polake. Viktima e dhjetë, një grua, ndërroi jetë në spital një natë më pas.

Viktima e parë e identifikuar publikisht është Lea, një vajzë 15-vjeçare me origjinë kosovare. Halla e saj shkroi në Facebook: “Sot, mbesa ime Lea humbi jetën tragjikisht në sulmin në Graz. Lutemi për shpirtin e saj.”

Nxënësit që mbijetuan tregojnë se janë shtirur si të vdekur për t’i shpëtuar autorit, ndërsa të tjerë vrapuan për jetën.

Një video tronditëse tregonte viktimat mbi barela dhe disa të mbuluar me çarçafë të bardhë, ndërsa ambulanca ajrore i transportonte të plagosurit në spitalin rajonal të Graz-it.

Prindërit, në panik, u mblodhën me shpejtësi në shkollë. Një baba tregoi se djali i tij u shtir si i vdekur për të mos u qëlluar. Një nënë tha: “Djali më telefonoi duke më thënë se po qëllohej në shkollë dhe mendonte se do të vdiste. Mësova vetëm dy orë më vonë se ai ishte gjallë.”

Në vendngjarje mbërritën mbi 300 forca policore, përfshirë njësitë speciale Cobra, 65 ambulanca, 2 helikopterë dhe 158 paramedikë.

Policia konfirmoi se Artur i kishte blerë armët në mënyrë të ligjshme, njëra prej të cilave vetëm pak ditë para sulmit.

Austria, një nga 10 vendet më të sigurta në botë, u trondit thellë nga kjo ngjarje. Kancelari Christian Stocker e quajti “një ditë të zezë në historinë e vendit” dhe shpalli tre ditë zie kombëtare.

Në mbrëmje, në Katedralen e Graz-it u mbajt një ceremoni përkujtimore, ndërsa sheshi kryesor i qytetit u mbush me qirinj. Sot në orën 10:00 do të mbahet një minutë heshtje në të gjithë vendin, ndërsa flamujt në pallatin Hofburg në Vjenë do të ulen në gjysmë shtize.

Radha të gjata u formuan pranë qendrës së dhurimit të gjakut në Graz. “Erdha sepse doja të bëja diçka. Ndihesha e pafuqishme”, tha Johanna, 30 vjeç.

Austria ka një ndër normat më të larta të zotërimit të armëve në Europë: mbi 370 mijë qytetarë zotërojnë ligjërisht rreth 1.5 milion armë të regjistruara.

Presidenti Alexander Van der Bellen u shpreh: “Ky tmerr nuk mund të përshkruhet me fjalë.” Ministrja e jashtme tha: “Si nënë e tre fëmijëve, më dhemb zemra.” Ndërsa guvernatori lokal deklaroi: “Zemra e gjelbër e Austrisë po qan.”