Nga Alan Ohnsman | Forbes
Tesla po përjeton një nga momentet më të vështira në historinë e saj. Shitjet e automjeteve kanë rënë ndjeshëm në tregjet kryesore globale – 31% në Kaliforni, 43% në Evropë dhe 29% në Kinë vetëm në muajt e parë të vitit. Aksionet e kompanisë janë ulur me 34% dhe imazhi i saj po pëson goditje të forta, teksa protestat kundër Elon Musk po shtohen dhe automjetet Tesla po digjen si shenjë revolte në Shtetet e Bashkuara dhe Evropë.
Konkurrenca po shfaqet më agresive se kurrë. Gjiganti kinez BYD ka tejkaluar Tesla-n në të ardhura dhe pritet ta kalojë këtë vit edhe në shitje globale të automjeteve elektrike. BYD po ofron teknologji më të avancuar, çmime më të ulëta dhe ka lançuar një sistem të karikimit ultra të shpejtë që tejkalon Supercharger-ët e Tesla-s. Ndërkohë, sistemi i ri i drejtimit autonom “God’s Eye” i BYD-së sfidon drejtpërdrejt “Full Self-Driving” të Musk, i cili ende kërkon mbikëqyrje njerëzore.
Në Kinë – tregu më fitimprurës i Tesla-s – situata është veçanërisht alarmante. Fabrika e Shangait, e cila dikur ishte simbol i suksesit, tani po përballet me rënie të kërkesës dhe konkurrencë në çdo aspekt. Sipas analistëve, Kina lejoi fillimisht investimin e Tesla-s për të përfituar teknologji, por tani po e përdor atë për të ndërtuar automjete më të mira, më të shpejta dhe më të lira.
Në SHBA, ndonëse tregu i makinave elektrike u rrit me 14%, Tesla pësoi rënie me 11%. Në Kaliforni, shitjet ranë 31%, ndërsa konkurrentët si Hyundai dhe GM panë rritje mesatare prej 24%. Edhe modeli më i fundit i kompanisë, Cybertruck, është konsideruar një dështim – me shitje të dobëta dhe tetë thirrje për rikthim (recalls) vetëm në vitin e parë.
Ndërkohë, Elon Musk përpiqet të shndërrojë Tesla-n nga një prodhues makinash në një kompani teknologjie, duke premtuar miliarda dollarë nga robotët humanoidë dhe inteligjenca artificiale. Por edhe këtu ai përballet me konkurrencë serioze nga kompani si Waymo dhe Boston Dynamics, të cilat kanë teknologji shumë më të avancuara.
Investitorët dhe analistët po ngrenë alarmin. JP Morgan ka ulur parashikimet për shitjet e Tesla-s në vitin 2025, ndërsa interesimi i konsumatorëve për markën ka rënë me 7% – rënia më e madhe për çdo markë premium. Ross Gerber, një nga investitorët më të hershëm, shprehet se “kompania më e rëndësishme për klimën dhe ambientin tani po trajtohet si një paria për shkak të Elonit.”
Kriza që po përjeton Tesla nuk është vetëm tregtare apo teknologjike, por gjithnjë e më shumë po shihet si një pasojë e drejtimit kaotik dhe imazhit polarizues të vetë Elon Musk. Në një kohë kur tregjet globale po orientojnë vëmendjen drejt prodhuesve kinezë, Tesla rrezikon të mos jetë më lideri i padiskutueshëm i revolucionit elektrik – por një histori suksesi që nuk arriti të mbijetojë konkurrencën që vetë e frymëzoi.
