Në faqen kryesore të Harvard University shkruhet me shkronja të bardha “Kërkimi sjell përparim”—një slogan që i paraprin një serie arritjesh të fundit shkencore të universitetit Ivy League, nga trajtimet më efektive për depresionin klinik deri te përparimet në robotikë që ndihmojnë të sëmurët me goditje cerebrale të rifitojnë lëvizshmërinë. Ky është gjithashtu një mesazh i fshehur për të kundërshtuar sulmin e gjerë të administratës Trump ndaj financimeve për kërkimin universitar.
Harvardi bëri bujë të hënën kur presidenti i tij, Alan Garber, doli hapur kundër administratës Trump, duke refuzuar kërkesat që universiteti të heqë dorë nga programet e diversitetit, të kufizojë protestat studentore dhe të pranojë auditime federale në këmbim të fondeve publike. Ky refuzim erdhi pasi agjencitë federale paralajmëruan se do të rishikonin 9 miliardë dollarë fonde për Harvardin. Administrata Trump reagoi menjëherë duke ngrirë 2.2 miliardë dollarë në grante dhe 60 milionë dollarë në kontrata afatgjata. Të martën në mëngjes, Trump kërcënoi edhe me heqjen e statusit të përjashtimit nga taksat për Harvardin përmes një postimi në Truth Social. Por me gjasë, Garber e ka llogaritur këtë kosto: Harvardi, i themeluar 388 vite më parë, ka një fond investimi prej 53 miliardë dollarësh—më i madhi në botë—lidhje të fuqishme filantropike, një vlerësim kredie AAA dhe varësi relativisht të ulët nga fondet federale në krahasim me kolegët e tij.
Edhe pse i rrallë në mesin e mijëra kolegjeve amerikane, Harvardi nuk është i vetëm. Forbes ka identifikuar 39 shkolla që kanë diversitet të të ardhurave dhe forcë financiare—kryesisht në formën e fondeve të mëdha investimi—për të rezistuar ndaj kërkesave të administratës Trump, të paraqitura si përpjekje për të luftuar antisemitizmin në kampuse. Lista nuk përfshin vetëm universitetet më të pasura—Columbia University me 14.8 miliardë dollarë dhe Cornell me 10.2 miliardë mungojnë. Të dy këto institucione kanë mbi 20 mijë studentë secili dhe fonde për student rreth 360 mijë dollarë. Columbia, e kërcënuar me humbjen e 400 milionë dollarëve në grante dhe kontrata federale, në fund i pranoi kërkesat e administratës, përfshirë rishikimin e programeve për Lindjen e Mesme dhe ndryshimin e politikave për protestat studentore, përmes punësimit të 36 oficerëve të rinj dhe ndalimit të maskave në protesta.
Të 39 institucionet në listën e Forbes kanë fonde investimi prej të paktën 500 mijë dollarësh për student dhe vlerësim financiar minimal B+. Të gjitha, përveç Princeton University që ka një fond prej 33 miliardë dollarësh, mbështeten në fondet federale për jo më shumë se 20% të të ardhurave të tyre operative.
Në shkurt, Yale University me një fond prej 40.7 miliardë dollarësh dhe vlerësim A+, shpalli një plan për të vazhduar financimin e profesorëve dhe studentëve të doktoraturës të cilëve u ndërprenë fondet federale. Ndër institucionet e tjera që shfaqen në listë janë University of Notre Dame, Vanderbilt University dhe Washington University në St. Louis. Pjesën më të madhe të listës e përbëjnë kolegje liberale dhe fetare të pasura, si Williams dhe Amherst në Massachusetts, secila me fonde prej 3.3 miliardë dollarësh dhe vlerësime A+, si dhe Davidson College në Karolinën e Veriut me 1.3 miliardë dhe vlerësim A. Këto institucione të vogla fokusohen më shumë në arsimin universitar, i cili nuk varet nga fondet për kërkime shkencore.
Kolegjet “imune” ndaj Trump-it
Këto 39 kolegje private kanë fondet, shëndetin financiar dhe diversitetin e të ardhurave për të sfiduar kushtet e reja të Trump-it për financimin federal.
