I njohuri i botës së Formula 1, Flavio Briatore, është parë duke pushuar në jug të Francës në një jaht luksoz, në shoqërinë e djalit të tij 15-vjeçar dhe dy vajzave shumë më të reja në moshë, të veshura me bikini. Pamjet vijnë pak kohë pas ndarjes së tij nga Bernadetta Bosi, ish-studente e drejtësisë, me të cilën kishte një diferencë moshe prej 49 vitesh.

75-vjeçari italian, që së fundmi është rikthyer në Formula 1, u fotografua me rroba banje të kuqe, duke biseduar në bord dhe më pas duke bërë një zhytje në detin Mesdhe. Krahas tij ishin dy vajza të reja me bikini provokuese, ndërsa djali i tij, Falco, ishte gjithashtu i pranishëm.

Briatore dhe ish-bashkëshortja e tij, Elisabetta Gregoraci, 45 vjeçe, u martuan në vitin 2008 dhe u ndanë në 2017. Ata kanë një djalë të përbashkët, Falco, lindur në vitin 2010. Briatore është gjithashtu babai i modeles së njohur Leni Klum, lindur në vitin 2004 nga lidhja e tij me supermodelen Heidi Klum.

Ndër lidhjet e tij të mëparshme përfshihet edhe ajo me Naomi Campbell, me të cilën ishte i fejuar midis viteve 1998 dhe 2003.

I njohur për sukseset në Formula 1, Briatore ka fituar tituj botërorë me Benetton dhe Renault, duke menaxhuar legjenda si Michael Schumacher dhe Fernando Alonso. Por karriera e tij mori një goditje të fortë pas skandalit “Crashgate” në Çmimin e Madh të Singaporit më 2008, kur piloti Nelson Piquet Jr. u urdhërua të aksidentohej qëllimisht për t’i dhënë avantazh shokut të skuadrës, Alonso.

Si pasojë, Briatore u përjashtua përjetë nga çdo aktivitet i FIA-s në 2009, vendim që më pas u rrëzua nga një gjykatë franceze në vitin 2010.

Pas më shumë se një dekade larg, Briatore është rikthyer sërish në Formula 1 në vitin 2024 si këshilltar ekzekutiv i skuadrës Alpine, pas dorëheqjes së drejtuesit Oliver Oakes më 6 maj. Ai është emëruar nga Luca de Meo, CEO i kompanisë mëmë Renault, për të ndihmuar në çështje strategjike, përzgjedhjen e talenteve dhe rishikimin e strukturës së ekipit.

Megjithatë, FIA e ka bërë të qartë se Briatore nuk konsiderohet zyrtarisht drejtues i skuadrës Alpine, pasi nuk mban një licencë superlicence dhe nuk është pjesë e stafit të regjistruar.