Një moment i pazakontë dhe argëtues është filmuar në plazhin e Zvërnecit, ku një flamingo ka vendosur të marrë në “pronësi” bregun, duke përzënë pushuesit që ndodheshin aty pranë.

Në pamjet e shpërndara në rrjet, shfaqet flamingoja duke ecur e qetë, por me vendosmëri, drejt grupeve të njerëzve, të cilët, mes të qeshurash dhe surprize, fillojnë të largohen nga rëra për t’i hapur rrugë “mbretëreshës” së lagunës. Disa pushues e kanë pritur me kamera të gatshme, duke fiksuar këtë episod të rrallë të ndërveprimit midis faunës dhe vizitorëve.

Sipas banorëve dhe ekspertëve lokalë, flamingot janë të zakonshme në zonën e lagunës së Nartës, por afrimi i tyre kaq pranë plazhit është i rrallë dhe tregon sa shumë po ngushtohet hapësira natyrore për këto shpendë të hijshëm.

Ngjarja është bërë virale në rrjetet sociale, ku përdoruesit e kanë pagëzuar flamingon si “roja e plazhit” dhe “diva e Zvërnecit”, ndërsa kanë bërë thirrje për ruajtjen e habitatit natyror të saj.