Sean ‘Diddy’ Combs ka shënuar një fitore të rëndësishme në sallën e gjyqit, pasi prokurorët vendosën të mos ndjekin më disa nga akuzat më të rënda ndaj tij, përfshirë rrëmbimin dhe zjarrvënien e qëllimshme. Në një letër drejtuar gjykatësit federal Arun Subramanian, prokurorët sqaruan se nuk do të kërkojnë që juria të shqyrtojë këto akuza si pjesë e çështjes për konspiracion mafioz (RICO).
Megjithatë, akuzat ndaj Diddy-t nuk janë rrëzuar plotësisht. Ai vijon të përballet me akuza për trafikim seksual, posedim droge me qëllim shpërndarjeje, ryshfet, ndërhyrje në dëshmi dhe transportim për qëllime prostitucioni. Sipas ekspertëve ligjorë, kjo tërheqje e akuzave është një strategji e prokurorisë për të mos u diskredituar para jurisë dhe për të përqendruar argumentet në prova më të forta.
Provat për zjarrvënie vinin nga dëshmia e reperit Kid Cudi, i cili tha se makina e tij u dogj pasi Combs dyshohet se hyri në banesën e tij. Ndërsa akuza për rrëmbim bazohej në rrëfimin e ish-asistentes së Diddy-t, Capricorn Clark, e cila pretendoi se u rrëmbye nga producenti muzikor dhe u çua me forcë në shtëpinë e Cudit.
Avokatët mbrojtës e konsideruan këtë si një fitore të pjesshme, ndërsa vetë Diddy, i cili ndodhet në paraburgim në Brooklyn, mohon të gjitha akuzat. Argumentet përfundimtare pritet të zhvillohen këtë javë, ndërsa një vendim i jurisë mund të shpallet pas 4 korrikut.
