Një grua në Hunstanton, Norfolk, është vënë në qendër të kritikave nga fqinjët pasi ka mbushur oborrin e saj me mbeturina, mobilie të prishura dhe produkte ushqimore të kalbura, përfshirë kërpudha dhe qumësht nga Tesco. Pamjet tronditëse tregojnë një grumbull të madh plehrash para banesës së Sharon Cochrane, e cila, ndonëse është kërcënuar me masa nga Bashkia, nuk duket të jetë shumë e shqetësuar.

“Bota po shkon në ferr me karrocë dhe njerëzit shqetësohen për mobiliet në oborrin tim?”, është shprehur ajo me ironi.

Por banorët e rrugës Chatsworth nuk janë më të gatshëm të durojnë. Ata pretendojnë se kanë pasur probleme me këtë situatë prej më shumë se një dekade dhe se tashmë, jo vetëm që po përballen me erë të keqe dhe turp publik, por edhe me rrezik për shëndetin për shkak të minjve që po përhapen.

“Është një turp. Kemi bërë ankesa për vite, por asgjë nuk ndodh. Nëse s’e pastron ajo, do ta bëjmë ne”, paralajmëroi një nga fqinjët, ndërsa një tjetër shtoi: “Si mund ligji të lejojë dikë të jetojë në kaq shumë pisllëk?”

Këshilli Bashkiak i West Norfolk ka konfirmuar se ka nisur një urdhër ndalese në bazë të ligjit për Planifikimin Urban, duke e urdhëruar zonjën Cochrane të pastrojë ambientin. Nëse ajo nuk merr masa, autoriteti do të ndërhyjë me forcë dhe shpenzimet do t’i faturohen asaj.

Aktualisht, ndërkohë që vetë Cochrane pretendohet se po bën përpjekje për pastrim, fqinjët janë gjithnjë e më të paduruar. Rruga, e njohur për qetësinë e saj viktoriane, është kthyer në një simbol të neglizhencës dhe konfliktit komunitar.