UNICEF paralajmëron se fëmijët janë në “rrezik në rritje nga uria, sëmundjet dhe vdekja” pasi Izraeli ndalon dërgimin e ushqimit dhe ndihmave të tjera.
Mijëra fëmijë palestinezë në Rripin e Gazës po përballen me një kërcënim në rritje nga uria, ka paralajmëruar Organizata e Kombeve të Bashkuara, teksa bllokada e vazhdueshme e Izraelit ndaj ushqimit, ujit dhe furnizimeve të tjera thelbësore në këtë territor bregdetar të rrethuar e të bombarduar hyn në muajin e tretë.
Agjencia e OKB-së për të drejtat e fëmijëve (UNICEF) tha të premten se mbi 9.000 fëmijë janë shtruar për trajtim për kequshqyerje akute që nga fillimi i vitit.
Por situata është përkeqësuar që prej vendosjes së një bllokade totale ndaj enklavës palestineze në fillim të marsit.
“Për dy muaj me radhë, fëmijët në Rripin e Gazës janë përballur me bombardime të pamëshirshme, ndërsa janë privuar nga mallrat thelbësore, shërbimet dhe kujdesi jetik,” tha drejtoresha ekzekutive e UNICEF-it, Catherine Russell, në një deklaratë.
“Me çdo ditë që kalon nën bllokadën e ndihmës, ata përballen me rrezik në rritje nga uria, sëmundjet dhe vdekja asgjë nuk e justifikon këtë.”
Izraeli ka bllokuar çdo ndihmë humanitare drejt palestinezëve në Gaza që nga 2 marsi, duke nxitur dënime ndërkombëtare.
Programi Botëror i Ushqimit i OKB-së tha javën e kaluar se furnizimet e tij ushqimore janë “shteruar” për shkak të rrethimit, dhe paralajmëroi se kuzhinat komunitare, nga të cilat varen mijëra palestinezë, do të detyrohen të mbyllen.
“Ne nuk pyesim nëse ushqimi është i shëndetshëm apo i freskët; kjo është një luks. Ne thjesht duam të mbushim barkun e fëmijëve tanë,” i tha së fundmi një prind palestinez i zhvendosur Amnesty International-it. “Nuk dua që fëmija im të vdesë nga uria.”
Qeveria izraelite ka thënë se bllokada synon të ushtrojë presion mbi grupin palestinez Hamas për të liruar pengjet që mbahen në Gaza. Por që nga armëpushimi i shkurtër më herët këtë vit që solli shkëmbim të të burgosurve palestinezë me pengje izraelite nuk ka pasur asnjë lirimin të ri.
Ndërkohë, zyrtari i Hamasit Abdel Rahman Shadid të premten akuzoi Izraelin për përdorimin e urisë si një “armë lufte të qëllimshme” kundër palestinezëve.
“Fëmijët po vdesin nga mungesa e qumështit, jo vetëm nga bombat,” tha Shadid në një deklaratë të publikuar në kanalin Telegram të grupit.
Ekspertë juridikë dhe organizata të të drejtave të njeriut kanë theksuar se, si një fuqi pushtuese, Izraeli ka detyrimin ligjor sipas të drejtës ndërkombëtare për të siguruar ushqim dhe ndihma të tjera për palestinezët në Rripin e Gazës.
Ata e kanë dënuar bllokadën si shkelje të Konventës së Katërt të Gjenevës.
Sipas sistemit të Klasifikimit të Fazave të Sigurisë Ushqimore të Integruar (IPC), një autoritet global për monitorimin e urisë, qindra mijëra palestinezë të të gjitha moshave po përjetojnë nivele ekstreme të pasigurisë ushqimore në Gaza.
Amjad Shawa, drejtor i Rrjetit të OJQ-ve palestineze, i tha Al Jazeera-s se situata po përkeqësohet me shpejtësi pasi institucionet shëndetësore nuk kanë furnizimet e nevojshme për të trajtuar fëmijët me kequshqyerje.
“Nuk kemi as furnizime ushqimore, as materiale ndihmëse, as barna për këta fëmijë,” tha Shawa nga Qyteti i Gazës. “Ka shqetësim të madh se në ditët në vijim do të shohim më shumë viktima,” shtoi ai.
Në spitalin Kamal Adwan në Beit Lahiya, në veri të Gazës, mjeku Ahmed Abu Nasir tha se situata është më e keqe se kurrë për shkak të bllokadës.
“Fëmijët janë në fazën e rritjes dhe kanë nevojë jetike për lëndë ushqyese specifike, përfshirë proteinat dhe yndyrnat,” tha pediatri për Al Jazeera. “Këto nuk janë të disponueshme në Rripin e Gazës, veçanërisht në veri.”
Më shumë se 52,400 palestinezë janë vrarë që kur filloi lufta e Izraelit në Gaza në tetor 2023, sipas të dhënave të Ministrisë së Shëndetësisë në Gaza.
