Në një bashkëpunim që po ndez internetin, aktorja e njohur Sydney Sweeney ka lançuar një sapun të veçantë me kompaninë e kujdesit personal për meshkuj Dr. Squatch, i quajtur “Sydney’s Bathwater Bliss” – dhe po, përmban një “prekje” nga uji i saj i vërtetë i banjës.
Produkti, që do të dalë në shitje më 6 qershor, është krijuar si një përgjigje ironike ndaj kërkesave të shumta që Sweeney mori pas një reklame të mëparshme me të njëjtën kompani. “Ju vazhdonit të kërkonit për ujin tim të banjës… kështu që e ruajtëm,” shkroi ajo në një postim në Instagram, duke e shoqëruar me një foto në vaskë dhe një copë sapun në dorë.
Sapunëi përbëhet nga rërë, ekstrakt lëvore pishe dhe – siç thotë vetë kompania – “një pikë nga uji i banjës së vërtetë të Sydney-t”. Dr. Squatch e përshkruan aromën si “mashkullore me një flirt të freskët”, duke shtuar se nuk ka një manual për të kthyer ujin e një ylli të Hollywood-it në sapun, “por pikërisht kjo është arsyeja pse e bëmë.”
Zëvendëspresidenti i marketingut global të kompanisë, John Ludeke, tha se synimi nuk është vetëm marketingu sensacional: “Shpresojmë ta kthejmë këtë interes në një diskutim për rëndësinë e produkteve cilësore të kujdesit personal për meshkujt.”
Por interneti – si gjithmonë – nuk e priti këtë pa zhurmë. Komentet në rrjete sociale kanë variuar nga festime entuziaste te kritika të ashpra, me shumë që e krahasuan me veprimin e Belle Delphine, e cila bëri bujë në 2019 kur shiti ujin e banjës së saj për fansat.
Disa përdorues në Reddit e pyetën nëse kjo lëvizje është shfrytëzim i vetmisë mashkullore, ndërsa të tjerë e panë si një mënyrë të zgjuar për Sweeney që të përfitojë nga mënyra si është trajtuar nga industria dhe publiku. “Nëse e kanë kthyer në ikonë seksuale, pse të mos fitojë edhe vetë nga kjo?” tha një komentues.
Duket se “Sydney’s Bathwater Bliss” nuk është thjesht një sapun, por edhe një reflektim mbi kulturën moderne të adhurimit të famës dhe marketingut pa kufij. Në fund të fundit, siç thotë kompania: interneti jeton për këto momente – dhe ky sapun ishte i destinuar të ndizte zjarr.
