Familjet e izraelitëve të mbajtur peng në Gaza kanë thirrur një grevë të përgjithshme mbarëkombëtare të dielën e ardhshme, në shenjë proteste ndaj vendimit të kabinetit të sigurisë për të zgjeruar luftën dhe për të marrë nën kontroll qytetin e Gazës. “Po e ndalim vendin për të shpëtuar ushtarët dhe pengjet,” deklaruan të afërmit në Tel Aviv, të mbështetur nga Këshilli i 7 Tetorit, që përfaqëson familjet e ushtarëve të vrarë në fillim të luftës.

Organizatorët thanë se dhjetëra kompani dhe mijëra qytetarë tashmë janë shprehur se do të marrin pjesë në grevë, e cila do të nisë si nismë nga sektori privat. Sindikata më e madhe e punëtorëve, Histadrut, ende nuk është bashkuar, por pritet një takim me drejtuesin e saj për t’i bindur. Opozita izraelite e ka mbështetur grevën, ndërsa kritikët paralajmërojnë se plani ushtarak mund të rrezikojë jetën e rreth 50 pengjeve të mbetura, 20 prej të cilëve besohet të jenë gjallë. Kryeministri Benjamin Netanyahu mbrojti vendimin, duke e cilësuar si “mënyrën më të mirë dhe më të shpejtë për ta përfunduar luftën.”