Manjati i teknologjisë, Elon Musk, ka rihapur debatin për rënien e popullsisë në Evropë, përmes një postimi të ri në platformën X, ku ndau një hartë që tregon nivelin e lindshmërisë në shtetet evropiane.

Në komentimin e tij, themeluesi i SpaceX dhe Tesla shkroi:

“Evropa ose do të fillojë të ketë familje të mëdha, ose do të vazhdojë të vdesë”, duke theksuar sërish shqetësimin e tij të hershëm mbi rënien e lindjeve në vendet e zhvilluara.

Të dhënat e fundit konfirmojnë se shumë vende evropiane kanë norma lindshmërie më të ulëta se pragu prej 2.1 lindjesh për grua, një prag i domosdoshëm për të ruajtur stabilitetin demografik.

Italia, Spanja, Gjermania dhe disa vende të Evropës Lindore ndodhen në krye të listës për normat më të ulëta të lindshmërisë.

Musk e ka cilësuar më parë rënien e lindjeve si një nga rreziqet më të mëdha për të ardhmen e qytetërimit perëndimor.

Megjithatë, komentet e tij kanë ngjallur reagime të ndryshme – nga mbështetës që ndajnë të njëjtin shqetësim, deri te kritikë që e akuzojnë për thjeshtim të një problemi kompleks, duke neglizhuar faktorë si imigracioni, ndryshimet sociale dhe të drejtat e grave.

Rënia e popullsisë shihet gjithnjë e më shumë si një sfidë për ekonomitë evropiane, për shkak të plakjes së shpejtë të popullsisë, mungesës së fuqisë punëtore dhe presionit mbi sistemet publike të kujdesit shëndetësor dhe pensioneve.