Deklaratat e fundit të deputetit socialist Erjon Braçe, i cili publikoi pamje duke akuzuar një qytetar se “përndjek një mjeke”, kanë ngjallur reagime të forta për shkak të natyrës së tyre shpifëse dhe tejkalimit të kompetencave. Në vend që të përfaqësojë interesat e qytetarëve përmes ligjeve cilësore, Braçe po shndërrohet në një spiun politik, duke stigmatizuar publikisht individë të lirë dhe duke i etiketuar si shkelës ligji, pa vendim gjykate.

Braçe ka shpërndarë një video ku pretendon se një qytetar ka vendosur kamera për të përndjekur një mjeke, duke e quajtur ndërtimin e tij “të paligjshëm” dhe të legalizuar “skandalozisht”. Por prona në fjalë është e legalizuar dhe e njohur nga shteti, çka i jep qytetarit të drejtën absolute të gëzojë pronën e tij private. Në këtë rast, çdo akuzë e bërë publikisht nga një deputet bie në kundërshtim me parimin e shtetit ligjor dhe parimin e prezumimit të pafajësisë.

Pyetja që shtrohet është: Si guxon një ligjvënës të shpifë ndaj një qytetari në pronën e tij private, duke e etiketuar si përndjekës, kur vetë shteti i ka dhënë dokumentin e pronësisë dhe lejen e legalizimit? Nëse deputeti ka dyshime, rruga e duhur është drejtësia, e jo linçimi mediatik. Përndryshe, zoti Braçe nuk është duke bërë detyrën e një deputeti, por po luan rolin e një “fuksi” të vjetër, që i bie qytetarëve në qafë.

Një qytetar në pronën e tij private nuk mund të shpallet publikisht fajtor për “përndjekje” nga një politikan. Ky akt jo vetëm që dëmton dinjitetin e tij, por i jep të drejtë ligjore qytetarit t’i drejtohet gjykatës për shpifje dhe dëmtim të imazhit në publik. Deputetët kanë detyrën të hartojnë ligje që ndalojnë legalizime abuzive dhe të forcojnë shtetin ligjor, jo të përndjekin qytetarët me akuza pa prova. Nëse Erjon Braçe është i shqetësuar për ligjshmërinë, duhet të përdorë instrumentet institucionale që i jep mandati, e jo të përdorë rrjetet sociale për linçime personale.

Në këtë mënyrë, Braçe rrezikon të humbasë seriozitetin e një deputeti dhe të shihet thjesht si një spiun politik që merret me “llafe”, ndërkohë që qytetarët presin prej tij ligje cilësore dhe mbrojtje të të drejtave të tyre, e jo akte të pahijshme për të fituar vëmendje publike.