Elon Musk ka shpërthyer publikisht kundër administratës së presidentit Donald Trump, duke e akuzuar për “nënvleftësim” dhe për trajtim të padrejtë ndaj projektit të tij DOGE, të cilin e quajti “djalë fshikullimi” për të gjitha dështimet e qeverisë. Komentet u bënë në prag të një nisjeje të re të SpaceX, teksa Musk shfrytëzoi rastin për të sulmuar projektligjin gjigant të Trump me vlerë 3.8 trilionë dollarë.
“DOGE po trajtohet si fajtori për gjithçka. Edhe kur s’kemi lidhje fare, ne fajësohemi”, tha Musk për Washington Post, ndërsa për CBS theksoi se “projektligji e dëmton thellësisht punën e bërë nga ekipi i DOGE”.
Marrëdhënia mes dyshes dikur të pandashme, që arriti kulmin pas zgjedhjeve të vitit 2024 ku Musk e mbështeti fuqishëm Trumpin, ka marrë një kthesë të ftohtë. I quajtur “Miku i Parë” në Shtëpinë e Bardhë, Musk pati një qasje të jashtëzakonshme në muajt e parë të mandatit të dytë të Trump, madje merrte pjesë në mbledhjet e kabinetit me bluzë “Tech Support”.
Por ndërsa Musk nisi të shkurtonte me qindra mijëra vende pune dhe të mbyllte 11 agjenci federale si pjesë e projektit DOGE, reagimi publik dhe brenda administratës ishte i ashpër. Protesta, Tesla të djegura dhe rënie e çmimeve të aksioneve ishin vetëm disa nga pasojat e reputacionit të dëmtuar.
Musk pranoi se u përfshi më shumë seç duhej në politikë: “Nuk i lashë kompanitë, por ndarja e kohës nuk ishte e drejtë,” tha ai për ARS Technica, duke nënvizuar se tani është tërhequr për t’u fokusuar tek SpaceX dhe misioni i tij për të kolonizuar Marsin.
Në qendër të pakënaqësisë është “Big, Beautiful Bill”, një projektligj i madh që synon ulje taksash dhe rritje të shpenzimeve, por që sipas Musk, do të rrisë borxhin publik në 36 trilionë dollarë dhe do ta bëjë të pavlefshëm kursimin 160 miliardë dollarë që DOGE kishte realizuar.
Pavarësisht tensioneve, Trump ka tentuar ta mbajë tonin pozitiv, duke thënë se Musk është “gjithmonë i mirëpritur” në Shtëpinë e Bardhë. Por Musk e ka bërë të qartë: prioriteti i tij është tashmë Marsi. “Jemi të gjithë të dënuar në Tokë. Dielli do të na djegë,” tha ai, duke paralajmëruar për fundin e jetës në Tokë dhe nevojën për t’u bërë civilizim ndërplanetar.
Musk ka braktisur këmishët MAGA për bluza “Occupy Mars” dhe i është rikthyer obsesionit të tij të hershëm: mbijetesa e qytetërimit njerëzor përtej Tokës.
