Në fund të gushtit 1997, Princesha Diana ishte plot energji pas një seance stërvitjeje dhe po planifikonte rikthimin në rutinë pas pushimeve që e prisnin në jug të Francës. Ajo rezervoi disa data për fillimin e shtatorit me trajneren e saj personale dhe mikeshën besnike, Jenni Rivett, e cila nuk e dinte se po shihte për herë të fundit gruan që për gjashtë vite kishte stërvitur tri herë në javë.

Në një intervistë të rrallë dhe prekëse, Jenni, tashmë 65 vjeç, kujton momentet e fundit me Dianën dhe ndjesinë e pashmangshme të trishtimit të fshehur pas buzëqeshjes së saj të famshme. “Diana ishte argëtuese, me humor të mrekullueshëm, por gjithmonë kishte një trishtim nën sipërfaqe. Ajo nuk e donte këtë jetë. Ajo thjesht donte të ishte një nënë dhe bashkëshorte e mirë,” thotë Jenni.

Një jetë që s’e zgjodhi kurrë

Në prag të pushimeve me Dodi Al-Fayed, Diana ishte në kërkim të qetësisë, por luftonte me plagët që nuk e kishin lënë që pas ndarjes me Princin Charles. Ishte viti 1997 – fundi i asaj që quhet “lufta e Windsorëve” – një kohë e trazuar për familjen mbretërore, dhe një periudhë transformimi për Dianën, e cila pas divorcit u përpoq të rindërtonte veten si një grua e fortë dhe e pavarur.

Jenni kujton: “Diana më fliste për gjëra shumë personale. Kishte raste kur i thosha: ‘Të lutem mos më thuaj më shumë – nëse nesër del në gazeta, do mendosh se isha unë.’ Por ajo e vlerësonte ndershmërinë time.”

Një miqësi e ndërtuar me besim, muskuj dhe humor

Stërvitjet përfshinin gjithçka – nga makina eliptike, pesha të lira, kardio, deri te rollerblading në parqet e Kensingtonit, ku Diana vishej me kapuç për të shmangur paparacët. Ishte pikërisht ajo që shpiku trukun për të veshur çdo ditë të njëjtën bluzë – atë të Virgin Atlantic, dhuratë nga Richard Branson – për të mos prodhuar foto të reja për mediat.

Bluzën e famshme ia dhuroi më vonë familja e saj Jenni-t, e cila e nxori në ankand në 2019 dhe përfitimet i dhuroi për t’i paguar shkollën djalit të kopshtarit të saj në Malavi. “Diana do ta kishte aprovuar,” thotë ajo.

Dashuri për djemtë dhe dhimbje për përçarjen e tyre sot

Jenni tregon se Diana do të ishte zemërthyer nga përçarja e sotme mes William dhe Harry. “Ata ishin gjithçka për të. E kam parë se si Harry ishte më çamarrok, por të dy ishin të sjellshëm dhe e adhuronin nënën e tyre.”

Diana ishte e përkushtuar edhe në mënyrën si kujdesej për trupin. Jenni thotë se nëse do ishte gjallë sot, në moshën 63-vjeçare, do ishte në formën më të mirë të jetës, falë disiplinës së saj dhe dashurisë për lëvizjen.

Për Diana-n që nuk do të plaket kurrë

Në çdo vizitë në Londër, Jenni shkon te portat e Kensington Palace. Kujton ditën pas vdekjes së saj, kur midis detit të luleve tha: “A më beson tani? E sheh sa shumë të donin?”

Diana mund të mos jetë më, por për ata që e njohën nga afër, ajo ishte shumë më tepër sesa “princesha e popullit”. Ishte një nënë, një mike besnike, një grua e brishtë që luftoi për të gjetur veten në një botë që s’e zgjodhi kurrë.