Rritja e çmimeve në bregdetin shqiptar po dekurajon gjithnjë e më shumë turistët italianë, të cilët deri para pak vitesh kishin zbuluar Shqipërinë si një destinacion ekonomik dhe tërheqës për pushime verore. Sipas mediave italiane dhe operatorëve turistikë në Bari, numri i italianëve që rezervojnë në jug të Shqipërisë ka rënë ndjeshëm në vitin 2025, me rezervime që janë më pak se gjysma e atyre të tre viteve më parë. Agjencitë turistike raportojnë se shumë klientë tashmë preferojnë të qëndrojnë në rajone si Puglia, duke përfituar nga ofertat e brendshme dhe fundjavat në vendpushime vendase.

Ekspertët italianë të turizmit theksojnë se Shqipëria, megjithëse ka përmirësuar infrastrukturën dhe lehtësuar burokracinë, po humbet pozicionin si destinacion me kosto të ulët. Problemet me shërbimet, transparencën e çmimeve dhe raportin cilësi–kosto po ndikojnë në rënien e interesit. Ndërkohë, Greqia vazhdon të tërheqë turistë, dhe segmenti i udhëtimeve me kroçera po përjeton rritje. Ekspertët nënvizojnë se bashkëpunimi mes Shqipërisë dhe Puglia-s për projekte të përbashkëta turistike dhe infrastrukturore mund të jetë rruga drejt një zhvillimi të qëndrueshëm.