Një ngjarje e pazakontë është regjistruar në Sanxhak të Kurbinit, ku një 62-vjeçar ka denoncuar në polici largimin e të fejuarës së djalit të tij, e cila kishte kohë që banonte në shtëpinë e familjes.

Denoncimi: “Nusja është zhdukur pa gjurmë”

Burri i identifikuar si K. R., banues në Sanxhak, është paraqitur dje në Komisariatin e Policisë së Kurbinit, duke raportuar se e fejuara e djalit të tij, shtetasja V. P., është larguar nga banesa pa asnjë paralajmërim dhe në rrethana të paqarta.

“U paraqit në Komisariat K. R., 62 vjeç, banues në Sanxhak, Kurbin, se është larguar nga banesa e tij e fejuara e djalit, shtetasja V. P.”, bëri të ditur policia në një njoftim zyrtar, pa dhënë më shumë detaje mbi ngjarjen.

Hetimet nisin, ende pa gjurmë të vajzës

Deri tani nuk dihen shkaqet që çuan në largimin e vajzës së re nga shtëpia e vjehrrit, ndërsa policia po shqyrton mundësinë e një konflikti familjar apo ndonjë arsye tjetër personale që mund të ketë ndikuar.

Policia e Kurbinit ka nisur hetimet dhe po punon për gjetjen e shtetases në fjalë, ndërsa rasti ka ngjallur reagime dhe kureshtje në zonë për shkak të rrethanave të pazakonta që e shoqërojnë atë.