Platforma shtetërore e-Albania, që supozohej të ishte zemra e dixhitalizimit të shërbimeve publike, disa nga sherbimet qe ajo do te ofronte jane teresisht të paaksesueshëm. Në një kohë kur shumica e qytetarëve përdorin telefonin si mjetin kryesor për të aksesuar internetin, kjo situatë përbën jo thjesht një problem teknik, por një përjashtim masiv nga e drejta për akses në shërbimet publike. Vetëm përmes kompjuterit mund të përdoret platforma, duke përjashtuar mijëra qytetarë që nuk kanë akses të përditshëm në një PC.
Në vend që të ndihmojë, e-Albania po pengon qytetarët të kryejnë veprime bazë: shkarkimin e certifikatave, aplikimet për dokumente identiteti, ekstrakte për banka, noterë apo gjykata. Situata është absurde: nëse je në një bankë dhe të kërkohet një dokument, nuk ke mundësi ta marrësh në kohë reale sepse aplikacioni nuk funksionon në celular. Qytetarët detyrohen të paguajnë zyrave private ose të braktisin procesin.
Përgjegjësja kryesore për këtë kolaps është Mirlinda Karçanaj, drejtoreshë e Agjencisë Kombëtare të Shoqërisë së Informacionit (AKSHI). Nën drejtimin e saj, jo vetëm që platforma ka rënë në funksion, por nuk është dhënë asnjë shpjegim publik, as afat për zgjidhje, as kërkim falje. Heshtja e AKSHI-t është simbol i arrogancës institucionale që po dëmton çdo qytetar që përballet me këtë mur dixhital.
Problemet me e-Albania janë të shumta:
Aplikacioni mobil nuk punon prej javësh, pa asnjë paralajmërim apo zgjidhje në horizont.
Ndërprerje të shpeshta të sistemit edhe nga kompjuteri.
Mungesë transparence dhe informacioni për përdoruesit.
Shërbime që në praktikë kërkojnë gjithsesi prezencë fizike apo dokumente shtesë.
Përjashtim teknologjik për të moshuarit dhe njerëzit pa pajisje moderne.
Pa akses për persona me aftësi të kufizuara dhe pa opsione ndihme të dedikuara.
Dyshime për mbrojtjen e të dhënave personale, për shkak të mungesës së transparencës teknike.
Në vend që të jetë ura midis qytetarit dhe shtetit, e-Albania është kthyer në një mur. Dhe në krye të këtij muri qëndron Mirlinda Karçanaj, pa dhënë asnjë përgjigje për dështimin e një prej platformave më të rëndësishme të administratës publike. Pa përmirësime urgjente dhe pa rikthimin e aksesit të plotë nga celularët, e-Albania nuk është më një shembull i dixhitalizimit, por një paralizë e shtetit modern shqiptar.
