Një histori e ndërlikuar familjare ka dalë në dritë në Britani dhe SHBA, pasi babë e bir kanë përfunduar në burg në raste të veçanta të dhunës.

Alex Gibbon, 34 vjeç, u dënua në shkurt 2024 me dy vite burg, një ndalim trevjeçar për drejtimin e mjetit dhe një urdhër ndalimi pesëvjeçar, pasi pranoi se kishte shkaktuar lëndim të rëndë trupor me drejtim të rrezikshëm dhe ngacmim pa dhunë ndaj babait të tij, Mark Gibbon. Sipas hetimeve, në maj 2023, pas një sherri të ashpër për biznesin e përbashkët, Alex e goditi të atin me një Porsche prej 80 mijë paundësh në Beaconsfield të Buckinghamshire.

Ndërkohë, Mark Gibbon, 62 vjeç, ndodhet aktualisht në paraburgim në Florida, i akuzuar për tentativë vrasjeje të shkallës së dytë dhe dy akuza për dhunë ndaj ish-nuses së tij, 33-vjeçares Jasmine Wyld – ish-partnerja e Alex-it dhe nëna e dy fëmijëve të tij.

Sipas policisë së qarkut Polk, incidenti ndodhi më 3 gusht 2025 në një resort luksoz pranë Disneyworld, ku Gibbon ishte me Jasmine dhe dy nipërit. Ai dyshohet se i shtyu disa herë kokën nën ujë gjatë një debati për testamentin e tij. Vajza 9-vjeçare e Jasmine ndërhyri për ta shpëtuar, ndërsa dy turiste të tjera nga fqinjësia thirrën policinë.

Burime familjare pretendojnë se Mark dhe Jasmine kanë qenë në një lidhje për disa vite, por kjo ka shkaktuar përçarje të thellë në familje. Po sipas tyre, përplasja e fundit ndodhi pasi Jasmine ishte e pakënaqur që nuk ishte përfshirë në testamentin e Markut, i cili thuhet se ka pasuri rreth 800 mijë paund.

Mark Gibbon, i cili drejton kompani ndriçimi dhe ka punuar në projekte për artistë si Ed Sheeran e Sam Smith, pritet të dalë sërish para gjykatës më 9 shtator. Ai ka pranuar se e ka shtyrë Jasmine nën ujë, por ka mohuar që ka tentuar ta mbytë.

Policia e Floridës deklaroi: “Për shkak se zoti Gibbon nuk mundi të kontrollonte inatin e tij, mund të kalojë shumë më tepër kohë në Florida nga sa kishte planifikuar.”