Përkundër ndalimit kushtetues për të kandiduar për një mandat të tretë, Presidenti Donald Trump nuk po e fsheh dëshirën e tij për të garuar sërish në vitin 2028. Madje, dyqani zyrtar i Trump ka hedhur në treg një produkt të ri që ka ngjallur debat: kapelën “Trump 2028”.

Kapela e kuqe me mbishkrimin e bardhë “Trump 2028”, e shitur për 50 dollarë, po përshkruhet si “shumë e kërkuar”, me njoftime në faqe se përpunimi i porosive mund të zgjasë më shumë për shkak të kërkesës së madhe. Përshkrimi i parë i produktit përmbante një lojë fjalësh ironike: “E ardhmja duket e ndritur! Rishkruani rregullat me kapelën Trump 2028”, një referencë e drejtpërdrejtë ndaj Amendamentit të 22-të që ndalon presidentët amerikanë të zgjidhen më shumë se dy herë. Përshkrimi më pas u zëvendësua me një frazë më neutrale: “Bëni një deklaratë me këtë kapele Trump 2028, e prodhuar në SHBA.”

Eric Trump u shfaq menjëherë me kapelën në një foto të publikuar nga llogaria “Trump War Room” në X (ish-Twitter), duke thënë për Daily Mail se “nuk kemi parë kurrë një produkt kaq të jashtëzakonshëm – shitjet po shpërthejnë, faqja thuajse u rrëzua.”

Presidenti Trump ka lënë të kuptohet në disa raste se është serioz për një kandidim të tretë. Në një intervistë për NBC News muajin e kaluar, ai tha se “nuk po bëj shaka”, duke shtuar se “ka mënyra” për ta realizuar këtë, edhe pse më pas pranoi se është “shumë herët për të folur”.

Ndërkohë, Kongresi nuk ka qëndruar duarkryq. Ligjvënësi republikan Andy Ogles nga Tenesi ka propozuar një ndryshim në Amendamentin e 22-të, duke lejuar një mandat të tretë nëse dy të parët nuk janë të njëpasnjëshëm. Sipas propozimit: “Asnjë person nuk do të zgjidhet në postin e Presidentit më shumë se tre herë, dhe asnjëherë pas dy mandateve të njëpasnjëshme.”

Sekretarja për shtyp e Shtëpisë së Bardhë, Karoline Leavitt, komentoi mbi deklaratat për mandatin e tretë, duke thënë se: “Presidenti përgjigjet me sinqeritet dhe buzëqeshje, dhe pastaj të gjithë bëjnë panik.” Ajo shtoi se “populli e do punën që ky president po bën.”

Ndërsa ligjërisht një mandat i tretë aktualisht është i pamundur, kapela “Trump 2028” ka ndezur një diskutim të ri rreth ambicieve politike të Trump dhe të ardhmes së kufizimeve kushtetuese në Amerikë. Dhe për momentin, duket se përkrahësit e tij po e blejnë këtë ide – fjalë për fjalë.