Ish-nënpresidentja e Shteteve të Bashkuara, Kamala Harris, nuk do të ketë më mbrojtje nga Shërbimi Sekret amerikan duke nisur nga 1 shtatori. Vendimi është marrë nga presidenti Donald Trump dhe u bë i ditur nga CNN, e cila publikoi një letër të firmosur nga Trump drejtuar ministres së Sigurisë Kombëtare, Kristi Noem.
Ligji amerikan parashikon mbrojtje të përjetshme vetëm për ish-presidentët, ndërsa për nënpresidentët ajo është e kufizuar në gjashtë muaj pas largimit nga detyra. Harris duhej ta kishte humbur mbrojtjen më 21 korrik, por ish-presidenti Joe Biden kishte vendosur ta zgjaste deri në janar 2026. Trump ka vendosur ta revokojë këtë shtyrje, duke autorizuar ndërprerjen e menjëhershme të masave të sigurisë.
Ky vendim vjen pak para publikimit të librit të ri të Harris, “107 Days”, mbi fushatën e saj të shkurtër presidenciale, që del në treg më 23 shtator. Përmes zëdhënëses së saj, Kirsten Allen, Harris shprehu mirënjohje ndaj Shërbimit Sekret për profesionalizmin dhe përkushtimin e treguar.
Trump ka ndërprerë më herët mbrojtjen federale edhe për figura të tjera si ish-këshilltarin e Sigurisë Kombëtare John Bolton dhe, në muajin mars, për fëmijët e Joe Biden-it, Hunter dhe Ashley.
