Me albumin e saj të ri “Vie”, Doja Cat po përgatitet të hapë një kapitull të ri artistik—ose më saktë, të ringjallë një nga jetët e saj të mëparshme. Në një intervistë për V Magazine, artistja që ka ndërtuar një karrierë mbi transformime të papritura, zbulon se ky projekt është një udhëtim retro-futurist që eksploron dashurinë, identitetin dhe mënyrën se si përjetojmë e ripërjetojmë jetën.

“Vie” do të thotë “jetë” në frëngjisht, dhe ashtu siç sugjeron titulli, albumi është një reflektim i kthimit në origjinë, për të gjetur rrugën drejt së ardhmes. E frymëzuar nga tingujt lo-fi të viteve ’80 dhe ndjesitë e “liminal space” që lidhen me ndërtesat e trishta ku kaluam fëmijërinë, Doja synon të shndërrojë kujtimet e zymta në diçka artistikisht të bukur. “Ishin ndërtesat e zyrave ku na çonin prindërit, me drita fluoreshente që të vrisnin sytë… por tani më sjellin një ndjesi ngushëllimi”, tregon ajo.

Në këtë album, ajo eksperimenton si me prodhimin muzikor, ashtu edhe me vokalin. Edhe pse e pranon se dikur nuk dinte të këndonte, tani ndjen më shumë kontroll mbi zërin e saj si instrument. Dhe ndonëse në të shkuarën kishte deklaruar se “nuk do të bënte më pop”, Doja e pranon se “Vie” është një projekt i udhëhequr nga pop-i, por i ndërtuar mbi mendim kritik dhe vetëdije. “Njerëzit e shohin pop-in si një sport për vajza dhe homoseksualë, jo si muzikë të vërtetë,” thotë ajo, duke sfiduar stereotipet rreth zhanrit që e bëri të famshme.

Lirikat e albumit janë të fokusuara në marrëdhënie dhe ndjeshmëri njerëzore: dashuri, seks, vetë-reflektim dhe dëshira për një afeksion më të thellë, më të sinqertë. “Është një album për dashurinë siç dua që të jetë në të ardhmen,” shpjegon ajo, duke përmendur edhe këngë që pasqyrojnë zhgënjimin ndaj marrëdhënieve moderne që shpesh mungojnë në romancë të vërtetë.

Por përtej përmbajtjes, ajo ka një qëllim më të madh: autenticitetin mbi suksesin komercial. Nuk është më në garë për klikime apo pozicione në Billboard. “Spotify nuk e bën muzikën më të mirë. Billboard nuk e bën një këngë më të bukur,” thotë ajo. Për Doja-n, suksesi është përvojë emocionale, jo statistike.

“Vie” është më shumë se një projekt muzikor; është një afirmim i identitetit, një përqafim i kujtimeve, dhe një rikrijim i së kaluarës përmes tingujve të së ardhmes. Me këtë album, Doja Cat nuk kërkon të shpikë veten nga e para—por të nderojë çdo version të saj që e solli deri këtu. Dhe sipas të gjitha gjasave, ka ende shumë jetë për të jetuar.