Reperi i njohur amerikan Sean “Diddy” Combs ka detyruar gra të marrin pjesë në festa seksuale të stërgjatura, nën ndikimin e drogës, të cilat i ka filmuar vetë — kështu dëshmuan prokurorët në hapje të gjyqit të tij në Nju Jork. Sipas akuzave, për dekada me radhë ai ka drejtuar një “organizatë kriminale” të ndërtuar mbi trafikimin dhe shfrytëzimin e viktimave, me ndihmën e një rrethi të ngushtë bashkëpunëtorësh që mbulonin krimet.

Mes akuzave shokuese janë episode të dhunës ekstreme: ai ka shkelur me këmbë kokën e një të dashure, ka varur një grua nga ballkoni dhe ka tentuar të djegë makinën e një burri tjetër. Gjyqtarëve iu tregua se Combs i ka sulmuar në mënyrë të egër gratë që nuk kanë pranuar të marrin pjesë në “Freak Offs” – siç quheshin këto orgji – ose që e kanë zemëruar në ndonjë mënyrë.

Avokatët e tij pranuan se ai ka ushtruar dhunë fizike ndaj disa të dashurave, por mohuan akuzat për trafikim seksual. Ata e përshkruan sjelljen e tij si të “tmerrshme, çnjerëzore dhe të dhunshme”, por që sipas tyre buronte nga xhelozia dhe përdorimi i drogës.

Combs, 55 vjeç, dikur me një pasuri afro 1 miliard dollarë, është përballur me rënie të shpejtë pas publikimit të një videoje ku shihet duke dhunuar ish-të dashurën e tij, këngëtaren Cassie Ventura, në një hotel në Los Anxhelos në vitin 2016. Videoja u transmetua nga CNN dhe u shfaq në gjykatë. Ventura, tashmë 38 vjeç dhe shtatzënë, pritet të dëshmojë personalisht.

Prokurorja Emily Johnson deklaroi se gjatë gjyqit do të dëgjohen dëshmi rrëqethëse nga viktima që do të tregojnë për ditë të tëra të kaluara në dhoma hoteli, nën ndikimin e drogës, të veshura me kostume për të përmbushur fantazitë seksuale të Combs-it. Ajo përshkroi një rast kur Cassie u ndje “sikur po mbytej”, pasi Combs e detyroi një eskortë të urinojë në gojën e saj.

Në një tjetër incident, Combs e sulmoi brutalisht Ventura-n kur zbuloi se ajo po takohej me një tjetër burrë. Më pas e shantazhoi me një video seksuale të regjistruar më parë si mjet për ta kontrolluar. “Këto video ishin suvenire të netëve më poshtëruese të jetës së saj,” tha prokurorja.

Ndërsa avokatja mbrojtëse Teny Geragos argumentoi se rasti nuk ka të bëjë me trafikim apo krim të organizuar, por me “dashuri, xhelozi, pabesi dhe para”. Ajo akuzoi viktimat për motiv monetar, duke i quajtur paditë “grabitje parash”.

Në seancën e parë, dëshmoi polici israelit Florez, i cili ishte roje sigurie në hotelin ku u filmua dhuna ndaj Ventura-s. Ai përshkroi Cassie-n si të tmerruar dhe të fshehur në qoshe, ndërsa Combs qëndronte në një karrige me vetëm një peshqir të mbështjellë. Një dëshmitar tjetër, eskorti Daniel Phillip, tregoi sesi merrte deri në 4,500 paund për të marrë pjesë në “Freak Offs”, dhe rrëfeu për eksperienca seksuale të stërgjatura ndërsa Combs e shikonte i maskuar.

Në sallën e gjyqit ishin të pranishëm gjashtë nga fëmijët e Combs, si dhe nëna e tij, Janice. Reperi hyri në sallë i buzëqeshur, i veshur me rroba gri dhe përshëndeti familjen me një gjest në formë zemre.

Gjyqi pritet të zgjasë rreth dy muaj, me dëshmi nga disa ish-punonjës dhe katër gra që e akuzojnë Combs-in për dhunë seksuale dhe trafikim. Përzgjedhja e jurisë ka qenë e vështirë dhe është shoqëruar me debate mbi përjashtimin e kandidatëve me ngjyrë.

Nëse shpallet fajtor për akuzat për trafikim seksual dhe komplot kriminal, Sean “Diddy” Combs përballet me burgim të përjetshëm.

Gjyqi vazhdon.