Cybertruck, makina futuristike e Elon Musk, që u paraqit si revolucion në industrinë e makinave, po shndërrohet në dështimin më të bujshëm të dekadave të fundit. Me një pamje që ndan opinionet dhe një rekord zhgënjyes shitjesh, ky projekt personal i miliarderit amerikan ka humbur plot 84% nga objektivi i shpallur vetë prej tij: 250,000 njësi në vit. Në vitin e tij të parë të plotë, Tesla arriti të shesë më pak se 40,000 Cybertruck, një shifër që e rendit poshtë edhe krahasuar me Ford Edsel – sinonimin e dështimit automobilistik të viteve ‘50.
Problemet nuk mbarojnë me shifrat. Që nga debutimi i tij në vitin 2019 me një incident të turpshëm ku xhami i ashtuquajtur “i pathyeshëm” u thye në skenë, Cybertruck është kthyer në një burim të pafund humorit në internet. Tani, pas tetë rikujtimeve zyrtare dhe ankesa për panele që bien vetë nga makina, konsumatorët janë të pakët dhe të painteresuar. Pavarësisht më shumë se 1 milion rezervimeve të deklaruara nga Musk, entuziazmi është shuar, ndërsa edhe investimet për të përgatitur prodhimin masiv në Austin po rezultojnë të kota.
Cybertruck nuk është thjesht një dështim i shtrenjtë – ai është edhe simbol i arrogancës së Musk. Mungesa e kërkimeve të tregut, vendimet e motivuara nga kursimet si heqja dorë nga boja për të shmangur një investim prej 200 milionë dollarësh, dhe zgjedhja për çelik inox që deformohet dhe tregon çdo gjurmë gishti, e kanë bërë makinën jo vetëm të vështirë për t’u prodhuar por edhe të papërshtatshme për përdorim praktik.
Në një treg ku pick-up-et si Ford F-150 sundojnë prej dekadash dhe kanë klientelë jashtëzakonisht besnike, Cybertruck nuk ka arritur të provojë vlerë funksionale. Ai është shumë i madh për rregulloret e sigurisë në disa shtete dhe i papërshtatshëm për eksport, duke e mbyllur në një treg të limituar. Çmimi fillestar premtuar prej 39,900 dollarësh është zhdukur – versioni më i lirë shitet nga 82,000 dollarë, ndërsa varianti më i shtrenjtë “Cyberbeast” kap mbi 105,000 dollarë, duke e nxjerrë nga loja edhe përfitimin nga kreditë federale.
Mbi 200 milionë dollarë inventar i pashitur, rënie e përgjithshme e shitjeve të Tesla në tremujorin e parë të 2025 dhe një komunitet online që po tall çdo ditë “CyberStuck”-un me video ku makina tërhiqet nga Ford dhe GM – të gjitha këto e bëjnë të qartë: Cybertruck është kthyer nga një ëndërr futuriste në një makth të shtrenjtë dhe të dështuar. Një Edsel i kohëve moderne, vetëm më i shtrenjtë, më i çuditshëm dhe më i turpshëm.
