Cristiano Ronaldo, i njohur për karakterin e tij të hekurt në fushën e lojës, tregoi një anë krejt tjetër të vetes këtë të premte, duke publikuar një postim prekës në Instagram me rastin e ditëlindjes së tretë të vajzës së tij më të vogël, Bella. Në një foto të ëmbël ku dyshja shihen të përqafuar dhe të buzëqeshur teksa shtrihen në bar, ylli i Al-Nassr shkroi: “Gëzuar ditëlindjen, dashuria ime! Dashuria jonë është gjithmonë me ty.”
Bella është fëmija më i vogël që Ronaldo ka me partneren e tij, modelen dhe personalitetin e rrjeteve sociale Georgina Rodriguez. Çifti u njoh në vitin 2016, kur Georgina punonte në një dyqan të Gucci në Madrid dhe Ronaldo ishte pjesë e Real Madridit. Nga lidhja e tyre kanë ardhur në jetë disa fëmijë, përfshirë Bellën dhe binjakët e lindur në prill 2022 – nga të cilët fatkeqësisht njëri prej tyre, një djalë, humbi jetën gjatë lindjes.
Përveç Bellës, Ronaldo është baba i pesë fëmijëve. Djali i tij i parë, Cristiano Jr, lindi në qershor 2010, ndërsa binjakët Eva dhe Mateo erdhën në jetë në qershor 2017 përmes një nëne surrogate. Georgina i ka rritur të gjithë si fëmijët e saj. Së fundmi, në një intervistë me Rio Ferdinand, Ronaldo tregoi se edhe momentet familjare shpesh shndërrohen në gara të vërteta, për shkak të natyrës së tij konkurruese. “Edhe kur luajmë padel me Cristiano Jr, inatosemi dhe nuk flasim për dy ditë,” u shpreh ai me humor.
Postimi i Ronaldos ka prekur miliona ndjekës, duke rikujtuar se pas figurës së një kampioni global fshihet një baba i përkushtuar që jeton për dashurinë ndaj fëmijëve të tij.
